Ang babaye sa mga panan-aw sa anak nga gibiyaan

Dunay gidala nako nga bata kay lagi gibinuangan sa dautang mga espiritu nga nagsunodsunod ug naghasol kaniya. Mao nga niabot gyud ang panahon nga siya nawala. Sumala pa sa iyang asoy gialirongan kuno siya og mga babaye nga maoy nidala kaniya ngadto sa usa ka balay nga hayag kaayo may mga plato kuno nga nangahulog ug nadunggan niya ang  katawa.

Nakita siya sa iyang mga higala  mga alas nuybe na sa gabii. Human sa pray over namaayo na ang iyang gibati. 

Sa akong bahin, akong napamalandongan kining mosunod:

1. Ang maong bata nagkinahanglan gyud unta sa iyang inahan apan subo lang gyud palandongon nga siya gibiyaan mga dos anyos pa lang ang iyang pangedaron.

2. Hilomon nga pagkabata ug buot nga mag-inusara. Sa maong pag-inusara tingali nakita niya ang dakong panginahanglan nga mohimo og kaugalingong kalibutan aron mamahimong maka-survive sa kasakitang emosyonal.

3. Agig paghatag og katagbawan ug pasalig nga wa sila pasagdi sa simbahan mao nga sila hatagan og linain nga panalangin nga magdala og kalingkawasan gikan sa bisan unsa o kinsa nga mahimong nihasol kanila. Pasalig kini nga gamhanan gyud ang Dios.

Sa mga higayon nga sama niini nakita nato nga mas daghanan karon sa atong mga kabataan ang nagkinahanglan dako uyamot sa pag-uyon sa ilang mga ginikanan.

Apan kutob na lang tingali kini sa hunahuna kay daghang mga kabataan karon ang gisalikway sa mga gituohan nilang mga anghel apan mga yawa diay.