Conjugal property dili mahimong ibaligya nga way pagtugot

Dear Atty. Divine,

Usa ko ka OFW ug duna mi property nga gipalit sa  probinsya. Ang nagbantay sa maong property mao ang igsuon sa akong bana kay ila man kining giuma. Nagbuwag mi sa akong bana 3 years ago ug ang among duha ka mga bata naa nako. Karong bag-o  nag-message  ang akong bana nga gusto niyang ibaligya ang among yuta pero wa ko mosugot kay iya ra sad iwaldas ang halin og maayo nalang nang yutaa ihatag sa among  mga bata. Ang akong pangutana kun pwede ba kini mabaligya  sa akong bana nga way akong pirma? Unsay akong buhaton kun iya gyung ibaligya ang property? Daghang salamat. —Jenny

Dear Jenny,

Considering nga conjugal ang property or pinalit ninyong duha atol sa inyong kaminyuon, hayan dili gyud makabaligya niini ang imong bana nga way pagtugot nimo or way pirma nimo. Kun iyang ipugos sa pagbaligya ang property nga way pagtugot nimo hayan mamahimong void ang pagbaligya og pwede kini nimong bawion pinaagi sa pagdangop sa korte tungod kay basi sa Article 124 sa atong Family Code ang magtiayon mao gyuy dunay katungod sa ilang conjugal properties. Thanks and God bless.—Atty. Divine

* * *

Alang sa inyong pangutana, ipadala lang sa Legal.Corner sa Banat News sa V. Gullas St., Cebu City  or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.