Dear Atty. Divine,
Duna koy problema labot sa akong credit card. Niadto pang June 2019 nadawat nako ang akong credit card ug last month dunay mitawag nako sa cellphone og nagpaila nga taga bangko. Matud niya nga ang ilang bank mo-waived daw sa annual fee sa akong credit card ug nangayo siya nako og details like card number ug uban pang information. Ako sab nga gihatag ug nangayo sab siya sa one time pin number. Nagtuo ko nga tinuod ‘to nga taga bangko ang nanawag nako but it turned out nga ilad diay to kay akong nasuta nga gi purchase diay sa Shoppee ang akong credit card og dul-an sa P15 mil ang nakuha. Miadto ko sa bangko ug miingon ang bank nga need gyud nako bayran kadtong nakuha sa akong credit card. Unsay angay nako nga buhaton? Unsaon nako paggukod ‘tong nangilad nako? Daghang salamat.
Jane
* * *
Dear Jane,
Makabayad gyud ka sa nakuha sa imong credit card tungod sa imong negligence nganong imong gihatag ang imong pin number nga dapat ikaw ra ang nasayud. Di gyud ka dapat mosalig karong panahona kay daghan kaayong mangingilad ug maayo gani kay dul-an sa P15 mil ra ang nakuha sa imong credit card. Maglisud sab ka paggukod sa nangilad nimo kay wa man gani seguro ka makaila adto niya kay ang imong pagtuo nga taga bangko ang mitawag nimo. Pareho ra sab gud na nga modus kaniadto nga tawgan ka kay nakadaug ka sa raffle unya pangayuan ka og kwarta or load. Ang maayo nimong buhaton mao ang paghinay hinay nalang gyud og bayad niini aron dili motubo ang maong utang tungod sa interest. Thanks and God bless.
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.