Welcome, new team of pastors

Bago lang kong nakagawas sa ospital. Ug sa pagsulat niini, under recuperation period pa.

Apan dihang nakadawat kog teks gikan ni Sis Inday Go, usa sa mga Parish Pastoral Council officers sa Guadalupe Parish Church sa miaging Agosto 13, kinsa nagpahibalo nga inig ka ugma, Agosto 14, Miyerkules, installation rites sa bag-ong naasayin nga Team of Pastors sa among parokya, diin kaming tanang opisyal giawhag nga patambongon.

Wala tuyoa, ingon sa may talagsaong gahom nga mikuhit sa akong galamhan ug mihunghong:

“Tambong! Himamata ang bag-ong pungpong sa kapariang nga Akong gipadala!”

Pagkasayo sa buntag, Agosto 14, Miyerkoles na, nakamatngon kog igong kahimsog sa akong panglawas. Naligo dayon ko, nag-ilis, namahaw ug nangandam.

Tuod man, wala pay 10 a.m. didto na ko sulod sa simbahan kuyog sa mga PPC officers.

Taudtaod, gisugdan ang misa. Pag-abot sa akto sa installation rites, gipailaila sa officiating priest, Msgr. Renato C. Beltran Jr., ang Team of Pastors nga naglangkob ning mosunod: Rev. Fr. Aloysius ‘Love’ Alojipan (Team Moderator), Rev. Fr. Eligio Suico, Rev. Fr. Froilan Bejoc ug Rev. Fr. Leopoldo Palacio (Team members).

Atubangan sa altar, gipabarog sila ug gipailaila ni Msgr. Beltran: “Ania ang mga gasa sa Diyos nga gipadala Niya sa inyong parokya. Tabangi sila diha sa inadlaw nilang gimbuhaton.

Dayon, gitawag kaming mga PPC officers, gipaduol sa ilang nahimutangan nga nag-atubang kanila.

Diay, mao kadto ang solemneng akto sa among paghimamatay, diin ang pangindahay sa apostolikanhong hangyo ug ang commitment sa pagbinuligay matag usa maoy nahimong pulidong unod.

Unya nag-abot among palad nga naglamanohay sa tumang kahinangop ug kadasig timaan nga kon unsang tahasa ang gitunol sa Team of Pastors niadtong tungora, kinasingkasing namong gidawat.

Giklaro ni Msgr. Beltran nga ang usa sa makaputol sa lig-ong kutay sa pagpangalagad mao ang pagbiya sa usang miyembro sa commitment nga gisaad niini ngadto sa Diyos.

Buot niyang ipasabot, nga sa tanang panahon, kinahanglang pirmeng magkinuptanay ang mga kamot sa kaparian ug PPC officers diha sa Kristohanong pagdumala-amuma sa simbahan.

“Makalaom mo, Fathers. And welcome to Guadalupe Parish Church, God’s home, your home and our home.” Hagawhaw sa among kasingkasing. Ug milanog ang masipang pinakpakay sa mga nanimbahay.