Padayon ang bola bisan suspendido

Bisan sa pagsuspenso sa operasyon sa Lotto subay sa kamandoan sa Presidente, aduna gihapo’y bola sa 6-digit nga duwa sa lotto gikan sa Hulyo 27-30, 2019.  Matud pa sa taga PCSO Gaming Department, nagpahigayon sila sa maong mga bola tungod kay aduna na kuno’y daghan’g nag-una-una pagpusta sa wala pa madeklarar ang suspension.  Pastilan ang tawo, basta sugal na gani ug kahilayan, la-omi nga makakaplag gayod og rason aron kini ipadayon ug dili mapugngan. Bisyo pa more, hangtud mahaghag ang purol!!!

Lapu-Lapu o pugapo: “Paleho la”

Mipasar karon og balaudnon si Cong. Paz Radaza nga ang katuyoan mao ang pagwagtang sa ngalan nga Lapu-lapu sa kalambigitan niini sa isda nga “Pugapo”, kay alang kaniya dako kining panamastamas.  Buot sa Kongresista nga hatagan og tukmang pasidungog si Lapu-lapu isip usa ka patriyota, bayani ug pangulo. Kun mapasar na kining maong balaudnon, wala na’y sud-an nga “Lapu-lapu” nga makita sa menu sa restaurant apan hayan dili gihapon kalikayan nga ang pulong Lapu-lapu mao gihapon ang malitok sa customer inig himo nila sa ilang order.  Matud pa sa akong higalang Intsik: “Paleho la” (Pareho ra)!!! 

Way pilde sa presinto sementeryo

Nanawagan karon ang COMELEC sa katawhan sa pagreport ngadto sa ilang buhatan sa mga pangalan sa ilang paryente nga mitaliwan na, nunot sa laraw sa COMELEC nga limpiyohon nila ang listahan sa mga botante.  Sama ra kini nga miangkon ang COMELEC nga aduna gayod diay mga patay nga ‘mibangon’ niadtong mga nanglabay’ng eleksyon aron mobotar. Mao diay kini rason nga ang mga lider sa politiko mangayo gayod og budget para sa “Presinto Sementeryo” kay matud pa nila, “sukad masukad, wala gayod kita’y pilde-pilde nianang presintoha Nyor”.  Pagkatoytoy!!!

Kay politika man bitaw

Dili na karon dawaton sa COMELEC, atol unya sa ilang pagpangreshistro sa mga bag-ong botante, ang mga dokumento sama sa Barangay Clearance, Police Clearance ug Cedula kon Community Tax Certificate. Dili buot sa COMELEC nga himoong pamolitika ang pagrehistro sa mga botante. Nalimot ba kaha ang COMELEC nga ang pagrehistro ug ang pagboto usa ka politikanhong katungod sa katawhan, busa ang pagpamolitika niini dili gayod kalikayan.  Pag-sure COMELEC uy!!!