Daw mas giganahan karon ang mga nagtinguhang buakon ang Probinsya sa Sugbo aron himuon kining duha ka probinsya karon nga ning bag-ohay lamang gipirmahan ni Presidente Rodrigo Duterte ang balaud nga nagbuak katulo sa isla sa Palawan aron mahimong tulo na kini ka probinsya.
Niadtong Abril 5 napirmahan ni Duterte ang Republic Act 11259 nga opisyal nga nagbuak sa Palawan ug natawo karon ang Palawan del Norte, Palawan Oriental ug Palawan del Sur.
Kinahanglan pa hinuon kini moagi og ratipikasyon human sa plebisito nga himuon sa sunod tuig.
Dinhi sa Sugbo, subling gibuhi ni Toledo City Mayor John Henry “Sonny” Osmeña ang tinguhang buakon ang probinsya sa Sugbo aron mamahimong duha kini ka independenteng probinsya pinaagi sa paghimo sa kasadpang bahin sa isla nga Occidental Cebu.
Usa sa mga rason mao nga adunay mga lungsod nga nabiyaan na sa kalamboan ug kun mabuak ang Sugbo, mas matutokan ang matag lungsod nga masakop sa mapormang duha ka probinsya.
Ang maong plano dili na bag-o, kay kaniadto gisuwayan sab kini sa pagbuak sa mga Sugboanong kongresista. Kaupaton ka bahin gani ang ilang gustong buhaton kaniadto.
May mga nanaway ug nipasangil nga ang katuyoan niini: aron adunay kabutangan kining naghinobra na kadaghang politiko sa probinsya nga gustong mag-gobernador ug uban pa.
Mahimo sab nga pamaagi kini aron nga makadaog kadtong mga kandidatong mga taga lagyong lungsod gustong mahimong gobernador ug uban pa nga pirmeng mapildi sa bangga sa ilang mga kaatbang.
May kamatuoran hinuon nga makaayo kini sa mga kalungsoran kay di na sila makigbahin sa pundo sa kaubang 80 ka lungsod kay makabaton naman sila og kaugalingong pundo.
Apan ang pangutana kun mouyon ba kaha ang mga Sugboanon nga naanad nang usa ra gyud ang Sugbo. Usa ray tingog, usa ray direksyon ug usa ray damgo para ra gyud sa Sugbo.