Nataligam-an nga katilingban

Higpit kaayo ang atong kagamhanan sa pagpatuman sa mga lagda kalabot sa pagtukod og mga edipisyo aron masiguro ang safety niini.

Gitahasan niini sa mga local government units ang Office of the Building Officials diin usa sa tan-awon kun unsa kini ka lig-on ug luwas ba gikan sa peligro ang mga okupante sa estraktura.

Lakip na ang mga fire exits, mga wiring sa kuryente kon nahasubay ba safety standard.

Kining maong patakaran napatuman ra man sa mga dagkong edipisyo o kadtong mga commercial establishments.

Apan na apply ba usab kini sa mga dapit diin nahimutang ang mga yanong pinuy-anan? Sa mga dapit diin kasagaran nanimuyo mga informal settlers?

Sa record sa Bureau of Fire Protection kasagaran sa mga dagkong sunog nahitabo gyud sa mga slum areas o kadtong mga pinuy-anan nga ginama lang sa mga light materials.

Ang mga balay nga sagad maapektohan sa katalagman, nasusi ba sa OBO? Bisan og pustahan wala gyud ni ma-inspection sa mga hingtungdan.

Nagpasabot lang nga ang mga tawo ang nagbuotbuot lang sa ilang installation sa kuryente wala magsubay sa safety standards, basta nakatukod lang og kapuy-an mataoran og kuryente o maka tap og kuryente bahala na.

Ang ingon niini nga sitwasyon ang gustong tutokan sa Bureau of Fire Protection BFP Region 7 pinaagi sa gilusad nilang Oplan Ligtas Pamayanan.

Sa pakig-alayon nila sa barangay, ilang tuktokon ang mga pinuy-anan aron susihon ang sitwasyon kun wala ba mameligro sa sunog.

Kun aduna silay makita nga sipyat, korihian dayon aron dili mahitabo ang sunog tungod kay ang sunog ra ba dili moila og silingan mangamong gani inig silaob na sa kalayo.

Mohimo sila og regular visit sa community diin kun sa una maghulat lang og alarma sa sunog sa mga bombero.

Apan karon gikinahanglan nga makig-alayon sila sa katawhan sa ilang awareness campaign batok sunog.

Gipahugtan nila ang prevention sa sunog kay sa huwaton nga adunay mahitabong disgrasya.

Target sa BFP nga makunhoran og 2% ang sunog matag tuig, apan pwede kaayo nga wala na gyu’y sunog mga mahitabo.

Maayo ang lakang sa BFP7 nga tan-awon ang sitwasyon sa kabalayan ilabi na kadtong mga gitawag nga informal settlers.

Nakatutok lang sa mga dagkong edipisyo apan nakalimtan ang mga estraktura nga kinaham nga lamyon sa sunog.

Kamatuoran niini kadtong dakong sunog sa Ermita halos mga light materials ang gigamit ug segurado nga wala gyud to masusi sa OBO kay gagmay ra man.

Nahinabi nako si Fire Senior Supt. Gilbert Dolot, Director sa BFP Region 7 ang hugot nga pakigsandurot sa komunidad mao ang malungtaron nga solusyon sa problema.

Nasulayan na kini sa rehiyon diin siya naglingkod kaniadto diin wala gyu’y nahitabong sunog tungod kay aktibo na kaayo ang katawhan.

Kun nahimo kini sa ubang rehiyon mahimo usab nato kini sa atong dapit.

Apan kun dili gihapon magpakabana ang mga tawo magpabilin gihapon ang problema, gani sa buwan lang sa Enero 58 ka sunog ang nahitaho sa region 7 ug sa Pebrero 100 ka sunog usab ang nahitabo diin ang dakbayan sa Sugbo ang numero uno.

Nahitabo kini sa mga ginagmay’ng katilingban nga nataligam-an sa pagsusi sa mga hingtungdan.