Digong kaamgid sa Rosas

Humot si Tatay Digong sa mga Overseas Filipino Workers (OFW) kay nakita nila nga siya ang kataposang baraha nga makaluwas sa nagkapusngapusngang kahimtang sa Pilipinas human lumsi pag-ayo sa nagbahang illegal drugs ug walay hunong kurapsiyon sa atong nasod nga daw gi-culture sukad pa sa nangaging mga administrasyon, mao nga lisod nang puohon.

Maoy gikuhaa’g base sa mga OFW ang kahimtang sa siyudad sa Davao, diin tungod sa pagka-disciplinarian ni Digong isip mayor sa maong dakbayan, nahimo kining usa sa mga safest place sa tibuok kalibotan nga nindot puy-an.

Gawas nga limpiyo ang siyudad, disiplinado pa gyud ang katawhan nga namuyo.

Uhaw sa disiplina atong nasod. Si Tatay Digong naa, puno niining hiyasa. Busa, siya ang solidong gisuportahan sa mga OFW, kinsa may minilyong registered voters nga relatives dinhi sa ato nga gidasig nila pagbotar ni Tatay Digong.

Tuod man, midaog si Davao City Mayor Rodrigo Roa Duterte pagka presidente. Kon unsay iyang gihimo didto sa Davao, giaplay sab niya sa Pilipinas.

War on Drugs? Abolish corruption? Iya dayon ning gisugdan paglingkod niya sa Malakanyang.  Napuno sa kaisog iyang kasingkasing paggukod taman sa ginhawa ning mga daotang anino nga maoy nakapaalaot sa atong nasod nga ambot, buhong man unta ta sa natural resources ug nganong nagpabilin man ang kadaghanan nato nga  nag-ilaid sa kakabos?

Nanghashas og mga utokang higala si Tatay Digong, kinsa iyang gituohang limpiyo ug kasaligan ug gipalingkod isip lider sa nagkadaiyang dagkong ahensiya ug departamento sa atong nasod. Apan malas, kay ang gipamutang niya sa mga dagkong puwesto aron moayuda sa iyang ‘Change is Coming’, mikiling sab.

Dili tanan tul-id. Aduna gyuy nabawog, nahiwi ug mibalik ra gihapon sa naandan nilang pagkahugaw.

Gumikan niini, gisaway siya. May mga higanteng traditional politician sa kaulohan nga gustong mokontrol sa iyang pagpamuno ug buot diktahan unsaon pagdala ang renda sa Pilipinas.

Apan naigking sila nga misulay sa pagkumkom niya. Kay si Tatay Digong kaanggid sa rosas sa tanaman. Matahom man tuod ang pagkalalik, pero may mga tunok nga mosamad sa gustong mokumot ug modominar sa unsay gusto niyang buhaton alang sa kabulahanan sa katawhan. Busa, way bisan kinsang hawra ang makagunit-gawong kaniya.