Mangahas mi sa pagdapit nimo sa pag-apil sa labing lapad nga blood donation activity sa labing dagkung dakbayan ug kalungsuran sa Sugbo sa tibuok adlaw karong Sabado, Oktubre 20.
Ang “Dugong Halad” gipasiugdahan sa DYAB 1512 Abante Pa, Bisaya! ug ABS-CBN Cebu aron pagtabang pagtubag sa dakung kakuwang sa suplay sa dugo sa Sugbo ug Central Visayas.
Ang dinalian nga pagpalambo sa suplay sa dugo gikinahanglan aron maluwas ang mga kinabuhi sa mga biktima sa katalagman, aksidente sa kadalanan ug mga emerhensiyang medikal.
Hinaut nga makahigayon ka sa pag-uban namo.
* * *
Gipahigayon ang “Dugong Halad” kausa sa matag tulo ka buwan kay gitakda sa Department of Health (DOH) ug Philippine Red Cross (PRC) nga luwas ang paghatag og dugo matag tulo ka buwan. Giisip pa gani nga makatabang sa kahimsog ang makanunayon nga paghatag og dugo.
Apan ang labing dakung kapuslanan mao ang pagtapak sa dakung haw-ang.
Ang usa ka bag nga dugo (500cc) nga mahatag sa matag donor makaluwas og hangtud sa tulo ka kinabuhi. Busa, palihug, ayaw imakuli paghatag ang gasa sa kinabuhi.
* * *
Hingpit nga gitabangan ang “Dugong Halad” sa Regional Blood Center (RBC) sa DOH sa Central Visayas ug sa PRC.
Mas daghan ang mga dapit nga pahigayunan sa kalihukan tungod sa pagtanyag sa mga luna ug mga kawani sa mga buhatan sa gobiyerno ug pribadong mga institusyon.
Makapili ka sa mosunod nga 16 ka venues nga labing duol nimo:
Lima sa Cebu City: Cebu Doctors University Hospital (2nd Floor PDR Room MAB-1); Perpetual Succour Hospital (SPC Medical Specialty Center Satellite Laboratory Lobby); North General Hospital (3rd Floor); Robinsons Cybergate (3rd Floor, duol sa MyHealth Clinic); ug SM CITY (Lower Ground Floor duol sa Food Court);
* * *
Duha sa Lapu-Lapu City: SM Hypermarket sa Basak (2nd Floor); ug Mactan Doctors Hospital (Conference Room). Makahatag sab og dugo sa Pacific Mall Mandaue (3rd Floor); Gaisano Grand Mall Cordova (Ground Floor); SM City Consolacion (2nd Floor); Gaisano Grand Fiesta Mall sa Tabunok, Talisay (3rd Floor); ug South General Hospital (2nd Floor).
Himuon sab ang “Dugong Halad” sa Cebu Provincial Hospital sa Carcar (Ground Floor), Danao (Ground Floor), Bogo (Ground Floor) ug Balamban (Conference Room).
* * *