Daghan og angay nga ipasabot ang mga opisyal sa Mandaue City Jail sa kamatayon sa gidudahang drug lord nga si Steve Go niadtong Martes sa udto.
Si Go gipusil patay sa laing piniriso nga si Cresenciano Erana sulod sa ilang selda.
Sigun sa report, naglalis ang duha sa wala pa matino nga hinungdan ug mibunot si Go sa iyang armas.
Giingon nga giilog ni Erana ang kalibre .38 nga revolver ni Go ug maoy gigamit pagpusil niya.
Ang pamilya ni Go kuwang sa pagtuo niini. Ang duda sa pamilya nga gituyo kini pagpatay tungod sa pasangil nga usa siya ka drug lord.
Dili mabasol ang pamilya ni Go kon dudahan ang mga awtoridad sa hitabo. Kini tungod kay ilang responsibilidad ang siguridad sa bilanggoan ug sa mga piniriso.
Usa sa angayan nga ipasabot sa warden sa Mandaue City Jail kon ngano nga nakasulod man ang armas sa bilanggoan.
Matud nila dunay armas si Go nga nailog ni Erana. Giunsa pagsulod sa armas nga wala mabantayi sa mga gwardiya?
Bag-o pa nga mihimo og greyhound operation ang Bureau of Jail Management and Penology (BJMP) ug wala sila’y pusil nga nakit-an sulod sa maong bilanggoan.
Ang pagsulod sa hinagiban sa prisohan usa ka seryoso nga hulga sa siguridad, dili lang sa mga priso, kon dili, lakip na sa mga tagdumala.
Dili na kinahanglang tagsa-tagsaon ang posibleng daotang mahitabo kon padayong magmika sa ilang katungdanan ang mga gwardiya sa bilanggoan.
Busa angayan nga himuon sa kadagkoan sa BJMP ang makuting imbestigasyon batok sa mga opisyal sa Mandaue City Jail.
Angayan nga ipaubos sa re-training ang warden ug ubang mga opisyal niini human sa nahitabo.
Kana kon tinuod nga lapso lang gyud sa siguridad ang nahitabo ug wala sila’y kalambigitan sa plano paghipos ni Go.
* * *