Unsa’y giapas sa mikandidato

Sa nag-high school na ko, nag-eleksiyon sa among klase. Pwerte nakong hupohupo aron dili i-nominate. Pastilan, ako man hinuo’y gitudlo nga himoong presidente. Mibalibad ko uy! Nasayod man gud ko nga isip lider sa grupo, imong kayod ang tanan gikan sa gagmay ngadto sa dagkong proyekto.

Kay para nako, ang trabaho sa lider dili ang pagsige’g sugo sa mga sakop, kon dili, ang lider maoy mopasiugda unsa’y buhaton nga angay sundon sa tanang miyembro hangtud na sa pagkahuman sa usa ka gimbuhaton.

Ikaduha, ang lider kinahanglang pirme nga naa’y kuwarta ang bulsa. Kini alang sa palitonong materyales sa proyekto nga nahunahunaan, plite sa lugar nga adtoon sa grupo ug usahay, pang-snacks samtang gibuhat ang proyekto.

Kadto lang si Papa Pilo, akong father-in-law, pagdaog niya’g konsehal sa Carcar, buhagaya sa iyang bulsa. Lalim ba’y kon may masakit nga pobre, moduol niya ug mangayo’g ipalit og tambal. Kon duna’y mamatay, mangayo’g lungon. Kon piyesta, daghang mamiyesta, ug kon Pasko, magpanon ang taga bukid aron mangayo’g pinaskohan.

Dili kay kini lang. Kon may mag-away’ng silingan, bisa’g nakatulog na si Papa, pukawon lang gihapon aron ipahusay ug ipahiuli ang nangagubang relasyon, ug daghan pa’ng bug-at nga kaakohan nga mokalit lang pagtunga sa tugkaran sa panimalay ni Papa.

Bisan og padulong na siyang mohigda aron mopahulay, mapugos pagbangon aron paghatag sa iyang kinasingkasing nga serbisyo. Ingon niini kahago ang trabaho sa usa ka lider, ma-eskuylahan man, ma-lungsod, o ma-barangay. Ang suweldo kaniadto ni Papa sa pagka konsehal tua ra gyud paingon sa mga tawo. Pobre si Papa kay wala man siya’y kuwarta, pero adunahan siya diha sa iyang limpyo nga panerbisyo.

Ang nakapait pa gyod, kay hasta ang panahon nga alang ra unta sa pamilya, kini langkaton pa ug adto mahipunta sa pagpangalagad sa katawhan. Maong naglibog ko nga sa kabug-at ning pagpangalagad sa katawhan, nganong nagpanon man ang milansar pagka opisyal sa barangay. Unsa kaha ang ilang giapas, no? Ang pagpangalagad gyud kaha?