Underpass project wa kinahanglana

_{Dili underpass ug flyover ang gikinahanglan sa siyudad sa Sugbo, kon dili, hustong masterplan nga maglakip sa pagpalapad sa karsada (road widening) aron makaapas sa nagkadaghan nga pribadong sakyanan.}

_{Kon wala pa dali-dalia og pahimo kanang Mambaling Underpass Project sa Department of Public Works and Highways (DPWH-7) nga nakaingon sa grabeng kalbaryo sa mga pasahero ug motorista nga paingon, ug gikan sa habagatan, wala unta kita’y kalibutan nga kita ra diay’ng mga Sugboanon ang gililong sa mga politiko ug sa mga opisyal sa DPWH-7.}

_{Ang underpass project susama ra sa flyover. Ang flyover estraktura nga paingon sa ibabaw, samtang ang underpass karsada nga gikalot ug gilunod paingon sa ilawom dayon butangan og atop. Ang flyover ug underpass wala gyu’y “increase” sa kapasidad aron kadaganan sa nagkadaghang sakyanan sa siyudad.}

_{Ikomparar ang flyover, underpass, ug sa lapad nga karsada. Makita nato nga ang napalapad nga karsada maayo og dagan ang trapiko. Ang sampol niini mao ang Cebu South Coastal Road ug Mandaue Reclamation Area nga tagtulo ka lane kada direksiyon. Maayo ang dagan sa trapiko, apan usahay gani maghuot pa.}

_{Diha sa Natalio Bacalso Avenue, dili underpass ang sulbad diha, kon dili, road widening. Hadlok ang mga politiko niining road widening kay mag-agi man og Expropriation Proceedings sa korte ang road right of way, kun RROW. Dugay kaayo kining maong proseso, busa dugay ang SOP o komisyon, kon duna man. Unya kuli ang tikas kay naay komisyoner sa korte nga nagdeterminar sa just compensation nga nagtan-aw.}

_{Laing gikinahanglan sa siyudad aron maluag-luag ang trapiko mao ang maayong traffic management. Mora man og wala na’y ayo ang atong City Traffic Office karon nga dili na makadisiplina sa mga motorista nga nagmugna og trapiko.}

_{Daghang sakyanan nga kagangkagang na, mokalit og kaguba nga nakamugna og trapiko. Ug kadaghanan sa traffic lights ug ang sistema niini panahon pa nga high school pa ko. Gawas sa pagpalapad, ang pagpanghawan sa mga karsada gikan sa mga nagbara nga estraktura, mga sakyanan nga gipataka og parking, ug mga dalan nga lubak-lubak.}

_{Ug ayuhon usab ang mga alternatibong rota nga mga gagmay’ng dalan nga gihimo na gani ang uban og parkinganan. Kon himuon lang kini sa siyudad, wala na kinahanglana kanang underpass nga nag-usik sa kuwarta gikan sa buhis sa katawhan unya nakalangay pa sa mga tawo.}

_{Karong adlawa ang full council meeting sa Regional Development Council-7 pinangulohan ni Kenneth Cobonpue. Akong awhag ni Kenneth ug sa IDC chairman nga si Glenn Soco dili magpadala sa braso-braso ni Kongresista Raul del Mar. Barug kamo alang sa mas maanindot nga Sugbo!}