Dili ba kaha himuong gatasan sa mga mapahimuslanong opisyal o kawani sa gobiyerno ang mga pundo nga itagana alang lamang sa pag-monitor sa Inayawan Sanitary Landfill?
Ang Cebu City Council nag-awtorisar ni Mayor Tomas Osmeña pagpirma og memorandum of agreement (MOA) tali sa Department of Environment and Natural Resources alang sa katukoran sa multipartite monitoring team (MMT) nga maoy mag-monitor sa padayon nga operasyon sa maong basurahan sa Inayawan.
Kini bisan gimando na ni DENR Secretary Gina Lopez nga sirad-an ang maong landfill tungod sa daghang kalapasan niini sa Environmental Compliance Certificate.
Gawas sa pagtukod og MMT, apil sa MOA ang environmental monitoring fund (EMF) ug environmental guarantee fund (EGF).
Ang siyudad motagana og P2 milyones alang sa EMF, samtang sa 2017 budget i-apil ang P50 milyones alang sa EGF. Ug kun mo-ubos na sa P20 milyones ang pundo alang sa EGF, pagapun-an kini. Magbukas og trust fund ang kagamhanan sa siyudad sa Sugbo alang niining mga pundoha.
Kadakong kuwarta niini alang lamang sa pagmonitor ug pagseguro nga dili makamugna og kadaot ang basurahan sa Inayawan.
Kinahanglang buhatan og guidelines ang pagpagawas niining kuwartaha nga gikan sa buhis sa katawhan.
Apan para kanako makahibulong kaayo nganong ingon niini ang sistema. Human gimando ni DENR Secretary Lopez nga sirad-an ang basurahan sa Inayawan, mitando na unta si Tomas nga iyang sundon ang mando ni Lopez.
Apan mikalit lang og bali ang hangin, padayong nagmagahi si Tomas nga sirad-an ang basurahan, unya karon gitukod ang MMT nga matud sa MOA ang chairperson mao ang direktor sa Environmental Management Bureau ug co-chairperson and DENR-7. Unya si Tomas ang vice chairman.
Sa ato pa, kinsay magbuot sa pagpagawas gikan sa P50 milyones nga EGF? Ang direktor ba sa EMB-7 nga dugay ra gisaway kay hadlok mopasira sa Inayawan landfill bisan sa daghang kalapasan sa ECC o si Tomas nga vice chairperson lamang?
Dili ba kaha pagpahilom lang sa EMB-7 ug sa DENR-7 ang P2 milyones nga EMF ug P50 milyones nga EGF?
* * *
Ubay-ubay na ang mga insidente nga naglambigit sa mga batan-on nga napatay sa anti-drug operation sa kapolisan.
Kun mamatay, ang mga ginikanan, mga paryente, ug mga kahigalaan sa mapatay sa kapolisan ang mosinggit og hustisya. Ug sakyan dayon sa Commission on Human Rights.
Uso kaayo didto sa kauluhan nga adunay desenteng mga batan-on nga mapatay sa anti-drug operation. Siyempre, isunod dayon sa kapolisan ang imbestigasyon pagsuta nganong anaa sa lugar ang mga mamatay nga mga batan-on.
Bitaw, nganong anaa man pud sila sa lugar asa naglublob ang mga drug pushers o drug lord?
Ang nakaparat, ang CHR ug mga human rights groups, hasta na ang mga ginikanan, paryente, ug kahigalaan, dali dayon makatawag sa insidente nga EJK (extra-judicial killing). Luoy ang mga polis nga igo ra nagbuhat sa trabaho.