Linigwatay sa lana
Human sa pila ka semana nga pagsaka sa presyo sa lana, may mga eksperto nang nangagpas nga nitugsad na ang lana sa iyang kinabaratohan nga ang-ang. Busa wa nay laing kapaingnan. Nipadayag sila og pagsalig nga magsugod na sab pagsaka ang presyo sa mga produkto sa lana sa mosunod nga mga adlaw.
Gitumbok nila ang mosunod nga mga sukaranan sa ilang pangagpas sa pagmahal sa lana: (1) Kasabotan sa Saudi Arabia, Russia ug Qatar paglaslas sa ilang produksiyon sa lana, ubos sa kundisyon nga molaslas sab ang ubang kanasuran; (2) pagsugod na og tidlom sa produksiyon sa lana sa Estados Unidos; ug (3) pagsulbong sa kalibotanong konsumo sa gasolina.
* * *
Nimahal ang lana di tungod sa aktuwal nga paglaslas sa produksiyon sa lana. Wa pay mga sakop sa Organization of Petroleum Exporting Countries (OPEC) nga nidason sa kauyonan paglaslas sa produksiyon. Sama nga wa pa say aktuwal nga laslas sa produksiyon sa lana sa tulo ka nasud nga nipahibawo sa kauyonan.
Ang kausaban sa presyo sa lana di manukad sa aktuwal nga kanihit o kaabunda sa suplay. Kun dili sa pangagpas unsay mahitabo sa kalibotanong suplay ug demanda sa lana. Mao nga ang kabalaka sa gubat sa tungatungang sidlakan, bisan wa pay bisan usa ka buto, igo nang makapasulbong sa presyo.
* * *
May mga pangagpas hinuon nga ang Saudi Arabia maoy labing ganahan nga magpabiling ubos ang presyo. Gipasikaran sa pagtuo ang padayong pagdumili sa Saudi paglaslas sa ilang produksiyon duha ka semana human naumol ang kauyonan uban sa Russia ug Qatar.
Ang Saudi sab maoy kusganong nisupak sa bisan unsang laslas sa produksiyon sukad sa pagtibugsok sa presyo usa ug tunga ka tuig nang nilabay tungod sa kabalaka nga maibanan ang ilang bahin sa merkado. Gawas pa, ang lana sa Saudi maoy kinabaratohan ug ang iyang panudlanan maoy labing adunahan nga makahimo siya pag-utong kun magpabiling barato ang lana sa mosunod pang katuigan.
* * *
Mga eksperto nga kumbinsido nga di mosugot ang Saudi nga mosaka pagbalik ang presyo sa lana niluwat sa mosunod nilang sukaranan:
Una, ang pagpabiling barato sa lana maoy nakita sa Saudi nga epektibong panagang sa pagsulbong sa produksiyon sa shale oil sa Estados Unidos nga makapahulga sa kadominante sa OPEC ug sa Saudi sa kalibotanong merkado;
Ikaduha, ang baratong lana maoy labing bangis nga silot nga ikapahamtang sa Saudi batok sa Russia tungod sa pagpasud sa ilang puwersa sa teritoryo sa Syria; ug
Ikatulo, ang baratong lana maoy lig-ong hinagiban sa Saudi aron nga di makabuylo ang paglambo sa ekonomiya sa higpit niyang karibal nga mga nasud sa Iran (nga nipabaha dayon sa suplay human nakalingkawas sa economic sanctions sa United Nations) ug Iraq.
- Latest
