Dear Atty. Divine,
Duna kami napalit nga mga properties ug nasabotan namo sa akong asawa nga bahinon na kini daan sa among mga anak aron mabalhin na kini sa ilang tagsa -tagsa ka pangan samtang buhi pa kami aron wala na sila’y problema sa pag-transfer sa umaabot. Ang akong pangutana attorney kun mahimo ba kini namo nga buhaton? Unsa man nga dokumento ang among pirmahan alang sa maong pag-transfer sa ownership sa among kabtangan? Daghang salamat sa imong pagtubag. - Wilson
Dear Wilson,
Mahimo nimo nga bahinon na daan ug i-transfer na ang ownership sa inyong properties ngadto sa inyong mga anak, bisan kun kamo buhi pa pinaagi sa pag-execute og Deed of Donation. Way balaod nga nagdili sa mga ginikanan sa pagdonar sa ilang kabtangan ngadto sa ilang mga anak. Ang inyong buhaton karon mao ang pag-execute og Deed of Donation nga inyong pirmahan lakip na sa inyong mga anak isip pagmatuod nga ilang gidawat ang maong donasyon, ug dayon inyong panotaryuhan sa abogado ug isumiter sa BIR alang sa pagbayad og Donor's Tax ug human niini, inyo na nga ma-process ang pag-transfer sa ownership sa maong property ug mabutang na ang tax declaration ug ang titulo niini sa pangalan sa inyong mga anak nga gihatagan. Dali ra ang proseso sa pag-transfer sa property kun ipaagi sa Deed of Donation kay sa Last Will and Testament nga moagi pa sa korte. Mas maayo sab nga dili ninyo ihurot sa pagdonar ang tanan ninyong properties ug kinahanglan nga magbilin mo og alang kaninyong duha aron duna moy magamit o mabaligya panahon sa emerhensya. Thanks and God bless! - Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.