EDITORYAL - Benepisyo gikan sa EDCA

Daghang benepisyo nga makuha ang Pilipinas gikan sa Enhance Defense Cooperation Agreement (EDCA) ilabi na sa natad sa dinaliang pagresponde kun may moigo nga kalamidad dinhi.

Nasuwayan kini dihang naigo ang nasud sa bagyong Yolanda niadtong 2013. Daling nakaresponde ang gobiyerno pinaagi sa pagpadala niini og mga sundalo, polis, bombero, medical personnel uban sa  ilang mga gamit.

Apan tungod sa gidak-on sa naigo sa bagyo, wala dayon maabot sa unang usa ka semana ang tanang mga naapektahang lugar, adunay mga nangamatay tungod kay wala dayon sila maabot sa hinabang nga gihimo sa gobiyerno.

Nag-unang hinungdan niini dili ang kawalay aksyon sa gobiyerno aron tabangan ang mga biktima, kondili, ang klaro kaayong kakuwangon niini sa mga gamit ilabi na sa transportasyon nga makahatud og hinabang sa mga apektadong lugar.

Dihang niigo ang Yolanda, duha lang ka buok ang C-130 transport aircraft sa Philippine Air Force, pipila ka buok nga landing craft sa Philippine Navy nga hinay kaayo og dagan, kakuwang sa mga heavy equipment paghawan sa mga debris, mobile medical clinics ug uban pa.

Sa pag-abot sa langyaw pinangulohan sa Amerika ayha pa naabot ang mga hilit nga dapit. Ang dakong kalainan nga ilang gidala mao ang ilang mga gamit nga wala sa imbentaryo sa gobiyerno sa Pilipinas.

Pinaagi sa EDCA mas paspas na unya ang pagtubag sa gobiyerno sa panginahanglan tungod kay usa sa unod sa kasabotan mao ang Humanitarian Assistance and Disaster Response (HADR).

Sa pagkakaron, adunay mga negatibong pagtan-aw sa EDCA kay lagi kuno pagyatak kini sa soberiniya sa Pilipinas ug daghan na usab mga pag-abuso unya sa kababayen-an nga mahitabo.

Apan kining ilang mga kabalaka mahimo mang mapugngan pinaagi sa mga hugot nga polisiya samtang naa sila dinhi. Apan ang kalamidad dili madiktaran og polisiya bisan unsa pa kahigpit ang pagpatuman niini.