Taliwala sa subsob nga kampanya sa atong kabomberohan sa kadelikado sa paggamit niining mga series lights nga gidayandayan sa atong panimalay, nakaresponde lang gihapon kita og sunog diin ang hinungdan mao ang series lights.
Ang maong sunog nahitabo niadtong December 7 didto sa Talisay City nga miugdaw og lima ka balay. Maayo na lang kay dali nga nakaresponde ang atong kabomberohan ug wala kini makakatap sa tibook lugar.
Nasuta sa imbestigador sa Talisay City Fire Station nga sa dihang gisaksak sa tagbalay ang series lights, mi-spark kini ug wala lang giibot. Paglabay sa pila ka minutos, duna nay aso ug misilaob na ang maong lawak. Posible nga ang gigamit nga series lights substandard.
Siguro alang niadtong padayong mogamit og mga suga nga pangdayan-dayan ug gusto nga pahayagan ang matag panimalay pinaagi sa paggamit sa series lights, mag-amping gyud aron luwas kita sa sunog.
Ug kun sa inyong tan-aw mga substandard ang mga series lights nga inyong napalit gumikan kay barato kini ug walay mga ICC markings, mas maayong ilabay na lang kini.
Dili na kita angayan pa nga maghuwat nga dunay sunog nga moulbo una pa kita mosanong sa mga pahimangno sa atong kabomberohan.
Bisan pa og maayo ang kalidad sa inyong napalit nga Christmas lights, kinahanglan gihapon ninyong limitahan ang oras sa pagamit niini.
Dili gyud angayan nga inyo kining pabuntagan. Hinaut nga sa kanunay magpabilin kitang alerto ug magpakabana aron hingpit kita nga luwas sa sunog.
Ug sa maong paagi mahimo nga sadya ang atong pagsaulog sa Pasko.