Ang bala ug ang buwak niadtong 1986 maoy sentro nga mga butang nga nakab-ot ug nahiuli sa Pilipinas ang kagawasan o demokrasya nga gipig-ot atol sa administrasyon ni kanhi presidente Ferdinand Marcos.
Ang bala maoy simbolismo sa posibleng pag-ulbo unta sa dako’ng kagubot ug sa pagbanaw sa dugo didto sa kaulohan diha nga nagsugod na sa pagtapok ang minilyon ka tawo didto sa Epifanio De los Santos Avenue (EDSA).
Nagbahas-bahas na niadtong higayona ang mga tangke de gera, ang armadong mga sundawo ug kapolisan bitbit ang ilang mga taming nga andam mamusil ug modasmag kun sugoon na sa ilang mga labaw aron sa pagbungkag sa mga nag-rally ug nagprotesta nga katawhang Pilipinhon.
Samtang ang mga buwak, sama sa mga puting rosas nga gibitbit sa mga madre ug gitunol ngadto sa nagkusmod na nga panagway sa militar, maoy nagsimbolo sa kahupayan sa nag-alintabo nga kasuko ug kakulba.
Ang maong mga buwak maoy instrumento nga napakalma ang tanan tali sa hut-ong sa mga sundawo, kapolisan ug sa mga nagprotesta nga Pilipinhon, hinungdan nga malinawon ug walay dugong nibanaw sa pagbiya sa mga Marcos gikan sa Malacañang.
Ingon niana kabililhon ug kamakahuloganon ang simbolismo sa bala ug buwak 29 ka tuig na ang nilabay.
Apan karon, makapasagmuyo apan makapahimuot huna-hunaon ang pagmaniobra sa mga nipauso sa "tanim bala" nga modus operandi diha sa Ninoy Aquino International Airport ug ang pag-abuso ug pagpasipala sa mga Sugbuanon sa kamabulokon ug kanindot sa mga buwak nga Celocia diha sa Barangay Sirao, Cebu City.
Ambot unsa ang gisaligan sa mga nipasiugda sa "tanim bala" modus operandi sa pabaga nga matang sa pangurakot. Dili ikalalis nga diha sa airport o sa bisan asa nga entry ug exit points, adunay mga pagpalusot nga mahitabo.
Apan ang pagbutang og usa ra ka bala sa mga bagahi niadtong OFW nga choir member nga mopadulong sa South Korea, sa American missionary nga si Lane Michael White nga pulos nangangkon nga gitanyagan sila sa taga NAIA og solusyon sa pagbayad na lang aron dili na sila mahasol, angay unta nga himoan dayon og dinalian nga aksyon sa mga hingtungdang ahensya ug dili ang paghatag og statistics kun pila ang nipalusot og mga bala nga ila na nga napasakaan og kaso.
Dili unta nila paaboton nga malimtan ug maabtan sa kalawos sa interes sa mga nireklamo ang paghatag og aksyon. Sama sa pagkalawos ug pagkamatay sa mga buwak nga Celocia sa barangay Sirao, Cebu City nga giyatakyatakan, gibali, giibot ug gikutlo aron himoong props samtang mag-selfie taliwa sa ilang gitawag nga "little Amsterdam." Ang makaloluoy nga mga buwak nga naghatag unta og kalipay ug kadasig sa uban nga makakita sa kanindot niini, karon nangamatay na.