Wala gihapon mausab ang mga Filipino, mahilig gihapon sa 11th hour o “unya ra” nga kinaiya nga diin magkarakara na ug mao pay isog. Nakita kini diha sa mga buhatan sa Comelec kagahapon ug diha sa mga mall registration diin sila nagdasok kay lagi wala nay oras.
Pirmeng rason, wala silay oras sa sud sa nakalabay nga duha ka tuig atol sa pagpahigayon sa Comelec og early registration, satellite registration, off-site registration ug uban pa. Ang nakapasagmuyo, kay kining mga paugatay nga magparehistro mao pay isog kaayo ug maningka nga daw ang Comelec pa maoy sad-an nganong dugay kaayo silang narehistro.
Kun nihatag pa lang sila og oras sa nakalabay nga duha ka tuig, dili ni maingon niini. Gihimo sa Comelec ang tanan aron sila marehistro subay sa mandato sa balaod.
Apan mag-unsa man kining mga programa sa Comelec kun ang mismong mga tawo nga buot nilang matabangan maoy walay pagpakabana?
Husto kini nga wala nay ihatag nga extension sa voters registration niadtong mga paugatay nga mga gustong mamotar sa 2016 Elections, kay sila mismo wala magtagad niini.
Ang importante nga mayoriya sa populasyon ang nakaparehistro ug nakapakuha og biometrics. Sila kadtong naghunahuna og maayo alang sa kaugmaon sa Pilipinas pinaagi sa bili sa tagsatagsa nila ka mga boto.
Samtang kadtong mga nagpaugat, wala silay gamit karong mga umaabot nga eleksyon.
Ang wala nila paglihok aron magparehistro, tataw nga wala sa ilang kasingkasing ang kaugmaon sa Pilipinas.
Sa mga wala makaparehistro, magsilbi unta kining leksyon kanila kun naglantaw sila sa bili sa ilang boto ug gustong makatampo sa kausaban sa panggobiyerno.