Tungod sa moderno nga kahimanan karong panahona, paspas na kaayo ang pagsabwag og inpormasyon pinaagi sa text messages ug sa mga social media, ilabi na ang Facebook.
Kaniadto, kinahanglan ka pa nga magpadala og suwat aron mangumusta sa imong pamilya o higala nga atua sa lagyo nga mga lugar.
Kun dinalian ang katuyoan, ipaagi kini sa telegrama ug tag 15 sentimos ang bayad kada pulong ug ang mensahe muabot sa imong gipadad-an mga duha o tulo pa ka oras kay ihatud pa man ang telegrama, ilabi na kun layo kini sa lungsod.
Karon, paspas na kaayo ang pagpadala og mensahe ug menos pa sa gasto. Sa usa lang ka “click” sa cellphone ang mensahe tua na, nadawat na. Apan subo lang palandungon nga ang social media giabusohan sa uban. Gigamit nga kahimanan aron pagdaot sa tawo nga wala nila magustuhi, ilabi na sa kontra sa politika.
Daghan ang migamit lang og dummy nga mga ngalan diha sa social media, dili dayon nimo mailhan. Kini tungod kay sayon ra man magbuhat-buhat og mga email address nga maoy basehan sa pag-open og account.
Kini unta maoy angay’ng tan-awon sa kadagkoan sa kagamhanan kun unsaon nila aron mapugngan ang pagkuyanap sa mga badlongon diha sa internet.
Samtang gihangop sa kadaghanan ang pagtumaw sa Facebook ug ubang social media networks, apan subo palandungon nga gigamit kini sa pagpangabuso.
Ang mihimo sa pagpangabuso migamit og mga dummy nga ngalan aron sila dili mailhan ug makaatake sila sa tawo nga wala nila magustohi pinaagi sa pagpasangil bisan unsa na lang. Ila kining gihimo kay wala man sila’y kaisog pagbuhat sa pasangil nga bakak kun wala’y maskara ang ilang mga panagway.