Pangilkil sa taxis
Haskang hinangopa nako paggawas sa arrival area sa Mactan-Cebu International Airport (MCIA) niadtong Sabado sa udto dihang nakakita sa taxi bay sa kilid sa ganghaan. Labihan nang duola kun itandi sa binuang nga sistema niadtong gobiyerno pay nagduma sa tugpahanan nga ang nangabot nga mga pasahero naglikus-likos paglatas sa tungason nga mga agianan aron lang makasakay og puti nga taxi.
Ambot unsay nasud sa bakukang sa karaang mga tagduma, gipalinya nilang mga taxi duol sa departure area maong nag-abot ang nangabot ug bumibiya nga mga pasahero ug nisamot kahuot. Taas gihapon ang among linya sa taxi bay apan may kapasilongan ug mas hamugaway. Nahibung hinuon ko nganong di malipayon ang taxi driver.
* * *
Kami ang gihan-okan sa karaan nilang mga reklamo sa pagpangilkil sa mga guwardiya ug mga polis sa MCIA. Nga wa mabadlong bisan nangisog pagbarug ang pipila sa mga biktima. Tungod tingali sa nagkaguliyang nga sistema sa tugpahanan. Niyango ang drayber dihang akong gipangutana nabadlong na bang pangilkil.
Ako siyang gisungog nga angay silang malipay kay mas sayon nang ilang pamasahero sa MCIA. Apan nitubag siya nga mas dako na ron ang ilang bayranan sa pagsud sa taxi bay. Di na sila kapasangil og pangilkil kay ang tugpahanan na gyoy nangolekta. Gipakita ko niya og opisyal nga resibo sa P10 nilang bayranan.
* * *
Dihang ako ning gituki atol sa Arangkada sa DYAB Abante Pa, Bisaya! daghang tigpaminaw ang nipahibawo nga samang P10 nga bayranan ang gipahamtang sa tanang sakyanan, apil nang mga taxi, nga mosud sa mga pantalan sa Dakbayan sa Sugbo ug sa duha ka labing dagkong bus terminals, sa South Bus Terminal sa Natalio Bacalso Ave. ug sa North Bus Terminal sa Subangdaku.
Pipila nila niingon nga di angay’ng moreklamo ang taxi drivers. Nipasangil sila nga kasagaran sa taxi drivers wa motuman sa gimando sa Land Transportation Franchising and Regulatory Board (LTFRB) nga P10 nga laslas sa flagdown rate busa tabla ra nga patongan sila og P10 sa tugpahanan, pantalan ug terminal.
* * *
Ang kalapasan di mapapas sa laing kalapasan. Di makiangayon ang pagpabayad sa taxi drivers sa paghatod-kuha og mga pasahero sa mga tugpahanan, pantalan ug terminal. Kay ang bugtong tinubdan sa ilang kita mao ang plitehan. Nga di mahimong patongan sa way paglapas sa taripa sa LTFRB o sa paglubag sa mga pasahero.
Wa magsapayan ang pipila ka pasahero pagbayad og P10 bugti sa ilang kasayon. Apan nganong kinahanglan mang panguwartahon ang mga taxi nga nakatabang paghatod-kuha sa mga pasahero? Di ba makiangayon nga himuon na lang kabahin sa mga serbisyo nga gibayran na sa terminal fees? Mahimong wa kinahanglana ang dugang taxi. Tingali gikinahanglan lang ang mas makiangayong pagtagad sa taxi drivers.
- Latest
