Wala g’yud ko masayop sa akong pangagpas nga mosaka ang popularity rating ni kanhi DILG Secretary Mar Roxas human sa pagtuboy ni Presidente Noynoy Aquino kaniya.
Kini tungod kay ang mga nagpakahilom ug naminaw pa sa pulso sa presidente monunot ra kaniya.
Sa labing uwahi nga survey nga gihimo sa Social Weather Station (SWS) kaniadtong Septiyembre 2-5, 2015, si Mar Roxas anaa na sa ikaduha nga puwesto gikan sa ikaupat nga lugar sa survey niadtong Hunyo.
Nag-una gihapon sa survey si Senador Grace Poe ug ang nag-una kaniadto nga si bise presidente Jejomar Binay anaa na lang sa ikatulo nga puwesto.
Duha ang tumong sa survey ug kini magdepende kun si kinsa ang gusto nga masayod sa resulta.
Kun wala’y nagbayad sa survey agency nga mohimo og survey, maingon nato nga ang agency mismo ang gusto nga masayod kun si kinsa ang posible nga modaug sa umaabot nga piniliay.
Kun ang politiko mibayad sa survey agency aron magpa- survey, apil ang iyang pangalan, ang maong politiko ang gusto nga masayod kun asa siya nakapuwesto.
Ang politiko mihimo niini aron himuon niya nga basehanan sa pagpadayon sa pagpapili o sa dili pagpadayon.
Ang segurista nga politiko mogamit sa mga survey agency aron ilang masayran ang ilang chance sa pagdaug.
Kun sa survey layo ra ang kahigayonan sa pagdaug, ang politiko dili na mopadayon sa iyang plano nga pagpapili. Mao kini ang tumong sa survey.
Ang political survey gigamit usab sa mga handler sa politiko nga giya sa ilang mga himuong lakang aron motaas pa ang rating sa ilang kandidato.