Bag-o na ang uniporme sa mga traffic enforcers nga sakop sa Cebu City Transportation Office (CTO), ang kanhi City Traffic Operations Management.
Bisan panahon sa gabii, dan-ag kaayo ang mao nga green nga uniporme, ug dali ra nga makit-an sa mga drayber ang enforcers, ug dili sila madam-agan samtang anaa taliwala sa karsada panahon sa gabii.
Apan may mga traffic enforcer pa ba nga anaa sa karsada panahon sa gabii? Mura’g dungan sa pagtikyup sa kangitngit mangahanaw man ‘sab ang mga traffic enforcer.
Klaro kaayo nga ang bag-ong uniporme sa mga traffic enforcer gipahaum g’yud sa opisyal nga kolor sa Team Rama. Apan pasagdi na lang ang kolor sa uniporme kay ang mahinungdanon mao ang serbisyo.
Giangkon hinuon ni Mayor Michael Rama nga labaw sa tanan ang serbisyo g’yud sa mga traffic enforcers. Mag-unsa man kun bag-o ang ilang uniporme apan ang mga enforcers dili manakop?
Mag-unsa man ang ilang bag-o nga uniporme apan dili gani makamao mobadlong sa mga drayber nga nagpaugat sa mga eskena ug nakabalda sa pag-agi sa ubang sakyanan nga anaa sa ilang likud?
Morespeto kaha ang mga drayber ngadto sa mga traffic enforcer abi kay bag-o ang ilang uniporme apan mao gihapon sila nga mga enforcer nga kusog kaayo nga mangilkil kanila?
Adunay mga traffic enforcers nga mura lang og mga “pahoy” kon mga tawo-tawo sa humayan nga magbarog lang sa karsada ug gitan-aw lang ang mga badlongong drayber.
Ang mga traffic enforcer nga ingon niini dili gayud karespetohan bisan og kapila pa sila mag-ilis-ilis og mga uniporme.