Dili tiaw ang bation nga problema sa ginikanan kun ang iyang anak matakboyan og dengue kay kining maong sakit makamatay.
Angay g’yud nga ang mga kawani sa Cebu City Health Department maninguha pagsanta sa pagkuyanap sa dengue, ilabi na diha sa mga public schools. Kaniadto lang miagi’ng semana, namatay ang usa ka tinun-an sa Science Class sa Lahug Elementary School. May lain pa nga tinun-an nga na-admit sa mga ospital.
Sagad g’yud unta nga himoon mao nga ang balay nga gipuy-an sa pasyente nga natakboyan og dengue, ingon man ang palibot niini, bombahan og kemikal sa mga kawani sa City Health department aron pagpatay sa lamok nga may dengue virus.
Apan hangtud karon wala pa’y kawani sa City Health department nga nakaadto sa panimalay sa mga tinun-an sa Lahug Elementary School nga natakboyan og dengue. Aduna’y posibilidad nga ang mga bata nga natakboyan og dengue napaakan og lamok nga may dengue virus diha sa tunghaan.
Dili tiaw ang kabalisa sa mga ginikanan kay gikan kaniadto’ng Enero ang City Health Department nakatala na og 384 ka kaso sa dengue, ug duha niini ang namatay.
Wala pa maapil sa ilang rekord kadto’ng tinun-an sa Lahug Elementary School nga namatay. Bisan og susama ra ang gidaghanon sa kaso sa dengue sa miaging tuig, 389 ug tulo ang namatay, apan dili kita angay nga mokumpiyansa.
Kanus-a pa man kita molihok, unya na ba kun uwahi na ang tanan? Kun dili kini tagdon dayon, ang lamok nga may dengue virus makapaak pa og laing mga tawo ug makapatakod pa og dengue sa uban.