Mga remedyo sa dayabetes (2)

Daghan pa ning mga remedyo para sa dayabetes, gihan-ay lang nato pag-una ang tanom nga sagad naila na dinhi sa atoa ug daghan sab ning anaa sa atong palibot. Basta seryuso lang  sa paggamit niini, gawas nga kini makadaginot sa gasto, epektibo sad kini nga way sayd-epek, dili sama sa gigamit nga druga.

*Dahon sa mangga (Mango leaves) – Ang tubigong duga niini sa dahon, igo na makalihok ang bloodsugar nga kapuslan nga mahimong enerhiya sa lawas. Mo-normal sad ang dugo sa protina niini (blood lipids o lipoprotein).  Kinahanglan makonsumo kini  usa ka oras sa di pa mokaon. Mao ni ang  paagi:

(a)  Pabuntagan nga humolan ang 10-15 ka dahon sa 1-2 ka basong tubig. Salaa ug imna nga wa pay kaon usa ka oras sa di pa mamahaw.

(b) Puwede sad magpauga’g dahon niini nga di ibulad sa adlaw. Hugasig maayo unya paugha sa hangin o sa landong nga init. Kupaya permi aron pareho mangauga’g maayo ang mga dahon nga di mamuti. Galinga’g pino o pulbosa nga isulod sa bildong garapon. Gamita ang ½ sa kutsarita sa usa ka baso init tubig, imna sama sa tsa usa ka oras  kada adlaw sa di pa maniudto ug manihapon.

* Dahon sa Curry (Curry leaves) – Makasanta o makapugong kini sa dayabetes nga napanunod gikan sa kaliwat. Mag-usap ka la’g 8-10 ka preskong dahon niini, kada buntag sa dili pa mukaon.

* Dahon sa kapayas (papaya leaves) – Magpabukal og 10 ka dahon  sa walo ka tasang tubig hangtud maitos ug upat ka tasa na lang ang tubig. Imna kini nga ginagmay lang sud sa usa ka adlaw. Detoks sad ni alang sa di kahilisan sa kaon.

Show comments