Gisolo ang kabilin

Dear Atty. Divine,

Duna’y yuta ang akong lola diha sa Cebu ug usa ra ang iyang anak nga mao ang akong papa. Upat kami ka magsuon, apan usa sa akong igsuon namatay na. Ang among kamaguwangan maoy nagpuyo sa maong yuta uban sa akong amahan. Pagkamatay sa akong amahan, akong gilukat ang portion sa maong yuta nga ilang naprenda apan tungod kay dia man ako magpuyo sa Mindanao ang akong igsuon ang ako gipadad-an og kuwarta sa paglukat ug ang iyang pangalan ang nabutang niini. Nasakit ang akong igsuon ug ang iyang anak nga tua sa abroad maoy migasto hangtud sa iyang pagkamatay. Karon akong nahibaw-an nga ang maong property nabalhin na sa pangan sa anak sa akong igsuon kay matud pa siya man ang naggasto sa tanan sa iyang papa. Unsa man diay ang anaa sa balaod attorney? Unsaon man namo pagbahin ang maong property? -

Godofredo

Dear Godofredo,

Way katungod ang anak sa imong igsuon nga iyang angkonon ang kinatibuk-ang property. Kini bisan pa kun siya’y nigasto sa pagkasakit ug pagkamatay sa iyang amahan nga usa sa mga tag-iya sa maong yuta. Base sa balaod kamo’ng mga anak angay’ng magbahin sa maong yuta in equal share. Kun tulo mo ka igsuon ang nahibilin pagkamatay sa inyo’ng papa kay ang usa ka igsuon kaninyo una man’g namatay, then bahinon og katulo ang maong yuta. Kadto’ng kamaguwangan ninyo entitled og usa ka share ug mao ra kadto ang ma-inherit sa iyang mga anak ug dili ang kinatibuk-ang yuta. Busa ang maayo ninyo’ng buhaton inyo’ng pakigsultian ang imong pag-umangkon ug pasabta siya nga ang iyang amahan dili ra maoy tag-iya sa tibuok property kondili kamo’ng tulo ka magsuon. Hinaut nga akong natubag ang imong pangutana.– Atty. Divine