Tungod sa problema pagpangolekta sa mga basura dinhi sa dakbayan sa Sugbo, gisakyan dayon sa Paglaum Basurero 20/20 ang kahigayonan ug mitanyag nga sila motabang sa pagpanghakut sa basura --- apan bayad. Nakadawat og report ang Cebu City Council nga mahal kaayo ang gipangayo’ng bayad sa Paglaum Basurero 20/20. Maingon nato nga nindot baya ‘sab ang katuyoan sa mao nga grupo. Ang nakaapan lang kay ang pangulo sa Paglaum Basurero 20/20 nga mao si Francis Paragas sakop man sa Cebu City Solid Waste Management Council ug ang gihimo sa iyang grupo maisip nga “conflict of interest.”
Lain kini nga “conflict of interest” nga gihimo sa mao nga grupo. Kaniadto, ang Paglaum 20/20 nalambigit usab sa pagpahigayon og seminar sa mga tag-iya og balay-patigayon dinhi sa dakbayan aron kahatagan sila og business permit apan duna gihapo’y bayad.
Tungod sa baruganan sa mga sakop sa Cebu City Council, si Paragas napugos sa pag-resign sa iyang pagka sakop sa Solid Waste Management Council aron nga makapadayon siya sa negosyo nga wala na’y mokuwestyon.
Ang mga tag-iya og balay-patigayon dili angay’ng sakripisyohon nga magkinahanglan pa sila og laing grupo aron mohipos sa ilang mga basura kay paglukat nila og business permit apil na sa ilang gibayran ang garbage fee.
Ang kagamhanan sa dakbayan sa Sugbo maoy angay nga mangita og epektibo’ng paagi sa pagpalambo sa iyang serbisyo pagpanghakot sa mga basura paingon sa labayanan sa mga sagbot.
Kun mapakyas ang dakbayan sa iyang katungdanan, maisip kini nga palpak si Mayor Rama sa iyang gipanumpaan.