Gipaabot karon sa katawhang Pilipinhon ang pagkunhod sa presyo sa mga nag-unang palaliton nga dakong balit-ad nga kahimtang sa nangaging katuigan tungod kay sa matag higayon nga mousbaw ang matag litro sa produktong petrolyo magsunod man usab niini ang pag-usbaw sa mga palaliton sa kamerkadohan.
Sa maong kahimtang kaniadto wala’y reklamo ang katawhang Pilipinhon kay dali man kaayong makasabot sa gihapin nga katarungan sa mga magpapatigayon nga ang pag-usbaw sa matag litro sa produktong petrolyo mao ang nahimong hinungdan sa gipatuman nilang pagpausbaw sa gibaligya nilang palaliton.
Niining nagsunodsunod nga pagkunhod sa presyo sa matag litro sa produktong petrolyo mao usab unta ang masinati karon sa katawhan ang pagkunhod sa presyo sa mga nag-unang palaliton kun ang gihapin nga katarongan kaniadto sa atong mga magpapatigayon maoy pagabasehan.
Ang dako na kaayo nga pagkunhod sa presyo sa matag litro sa produktong petrolyo karong panahona tataw gayud unta nga matagamtaman usab sa katawhan ang mga pagkunhod sa presyo sa mga nag-unang palaliton sa paghatag og epekto sa ekonomikanhong kahimtang sa katawhan.
Masinati na unta ang pagkunhod sa presyo sa matag kilo sa bugas, mga linatang pagkaon sama sa sardinas, gatas, mantika ug uban pa kay mao man kini ang dali kaayong mosaka kaniadto sa higayon nga mosaka usab ang presyo sa matag litro sa produktong petrolyo.
Subo kaayong palandungon kay ang maong kahimtang wala gayod magtagad ang atong mga opisyal sa kagamhanan kay wala sila mohimo og mga lakang sa pagsusi sa mga hinungdan kun ngano nga ang mga magpapatigayon wala man gayod magpakabana sa pagpakunhod sa presyo sa gibaligya nilang palaliton.
Sa maong kahimtang dili gayod mabasol ang katawhan karong panahona nga adunay moingon nga maoy gipalabi sa kasamtangang namunoan sa kagamhanan ang mga adunahang magpapatigayon nga makatagamtam og dagkong ginansiya kay sa mga kabus nga maluaglugan ang ilang pag-antus sa kalisod.