CEBU, Philippines – Mainiton nga gihangop sa katawhang Pilipinhon si Pope Francis sa iyang paghiabot dinhi sa nasud nga mao karon ang nahimo’ng sumsoman sa hisgotanan sa relihiyoso’ng katilingban.
Ang iyang gipakita nga talagsaong hiyas nga mao ang pagtagad sa mga kabus bisan og siya dako’ng pangulo sa simbahan maoy usa sa mga nag-unang gihisgotan sa magtapok nga katawhan.
Ang iyang pagpakigsawo og pangaon sa mga kabus nga biktima sa bagyo’ng Yolanda sa Tacloban ug mga biktima sa 7.2 magnitude nga linog sa lalawigan sa Bohol aron paghatag kanila og dugang kalig-on sa pagpakabuhi human sa mapait nga kasinatian sa ilang kinabuhi.
Matud sa katawhan nga ang gipakita ni Pope Francis nga kanunay’ng pagpaubos ug dako niya’ng pagtagad sa mga kabus magsilbi usab nga panag-ingnan sa katawhang Kristohanon.
Nahimo usab nga hisgotanan sa magkatapok nga katilingban ang kamahinungdanon sa pagpakigsawo og panihapon ni Pope Francis nga dili lang unta sa mga kabus makigsawo og pangaon ang Santo Papa kun dili apilon usab niya ang mga politiko.
Angay niya nga pahinumdoman ang mga politiko nga naglantaw lang sa ilang kaugalingong kabulahanan, ang mga magpapatigayon nga nagtan-aw lang sa ilang kaugalingong kalamboan ug ang mga adunahan nga mga tigpakaaron-ingnon.
Sa ilang pagpakigsawo og pangaon uban ni Pope Francis basin na lang nga dili lang molig-on ang ilang pagtuo ngadto sa atong Labaw nga Makagagahom kondili mao usab kini ang motuktok sa tinak-opan nila’ng galamhan nga maoy hinungdan sa ilang pagpadayon og subay sa nangahiwi nga dalan.
Ug diha sa katarong nga ilang gisubay maoy mopatigbabaw ang kaaghop sa ilang tagsa-tagsa ka kasingkasing nga maoy moganoy kanila sa paghimo og maayo ug hingpit na nila’ng huboon ang sapot nga naghabol sa itom nila’ng galamhan.
Ang itom nga kaisipan nga maoy nagganoy kanila sa kahakog ug kadawo nga gikaluhaan pa sa ilang pagpamentaha nga mao na hinuon unya ang magatukmod kanila ngadto sa kalayo sa kasaypanan.