Dear Atty. Divine,
Duna ko’y pangutana may labot sa katabang nga gusto’ng mo cash advance. Obligado ba kita’ng mga amo nga mopautang kanila? Kun obligado ta nga mohatag sa ilang cash advance, pila man ang maximum nga puwede nato nila nga ipautang? Mahimo ba nga ipaagi sa salary deduction matag buwan ang bayad sa ilang cash advance? - Lydia
Dear Lydia,
Base sa Implementing Rules sa Kasambahay Law, ang employer mahimo nga mopa-cash advance sa iyang katabang apan dili kini pinugsanay sa habig sa employer o amo. Sa ato pa, magdepende ra kini’ng tanan sa amo kun mopautang ba siya sa iyang katabang. Hinuon Base sa IRR sa Kasambahay Law, kini nagkanayon nga kun ugaling ang employer mopa-cash advance sa iyang katabang, kinahanglan nga dili ‘sab kini mosubra sa kantidad nga katumbas sa unom ka buwan nga suweldo. Mahimo ‘sab nga ipaagi sa salary deduction ang pagbayad niini apan kinahanglan nga dili mosubra sa 20 % sa iyang kinatibuk-ang suweldo ang i-deduct matag buwan ug kinahanglan ‘sab nga dunay pinirmahan nga pag-uyon ang katabang nga ipaagi sa salary deduction ang pagbayad sa iyang utang. Hinuon bisan tuod kun dili obligado ang employer nga mopautang sa iyang katabang apan dili ‘sab makiangayon nga balibaran kini ilabi na kun ang imong house helper nagkinahanglan og financial nga tabang. Thanks and happy New Year. - Atty. Divine
Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.