Dunay concerned citizen nga mipadala og email kanako ug nangutana kun “Unsa may bearing nianang pulong prinsipe sa kangitngit ug unsa man usab kabug-at ang isilot sa mosulti niana kun sala man ugaling kana?” Wala magpaila ang nangutana.
Una sa tanan dili ka lang nako pugson nga magpaila apan kun lalisonon pa kini’ng imong pangutana, mas nindot g’yud unta nga magpaila ka sa kadaghanan ilabi na ngadto sa hingtungdan nga imong pangutana.
Nagtuo ako nga ang gipasabot nimo sa maong pangutana mao ang kiha nga gisang-at ni Talisay City Administrator John Yre Delos Reyes batok sa usa ka komentarista sa radio nga mihingalan kaniya og “prinsipe sa kangitngit.”
Kun hisgutan nato ang giingon nimo’ng bearing, tingale nangutana ka unsa kamaot o unsa ka importante kun tawgon ka og prinsipe sa kangitngit.
Bahin sa kamaot niining pulonga, ang akong ikaingon nimo, subra pa sa maot kay nagkahulogan man kini nga ang gitawag og prinsipe sa kangitngit, usa ka Yawa.
Ambot kaha kun ang nagpadala nako’g suwat dako ka og katungdanan sa siyudad sama kang John Yre, unya tawgon ka og Yawa, malipay ka ba?
Ako sa akong bahin dili ako malipay kay nasayud ka na unsa ka daotan kining Yawa.
Wala’y tawo nga tawgon nimo og Yawa nga dili masuko ug dili mauwaw, hinungdan nga wala tingale makaantos si John Yre, mipasaka siya og kiha sa korte.
* * *