Dako’ng sayop ang hukom ni Vice President Jejomar Binay nga pagbalibad sa hagit ni Senador Antonio Trillanes alang sa usa ka debate kay mosamot nga ang katawhan magtuo na g’yud nga siya sad-an sa mga pasangil batok kaniya.
Sa gihimo’ng survey pipila ka buwan ang milabay, ang katawhan mipadayag nga gusto g’yud gani nila nga si Binay moatubang sa imbestigasyon sa Senate Blue Ribbon Committee aron makadungog sila kun unsay iyang tubag sa mga pamasangil kabahin sa kurapsyon.
Dili ikalimod nga puwerte’ng humota ni Binay ngadto sa mga botante kaniadto’ng eleksyon sa 2013 ug wala magduha-duha sa pagpalingkod kaniya sa pagka bise presidente.
Apan dili usab ikalimod nga daghan na niadto’ng mga tawo nga mibotar kang Binay sa miagi’ng eleksyon ang nagduha-duha na karon pagsuporta kang Binay sa iyang tinguha nga mag-presidente sa nasud.
Dili makabasol si Binay kun adunay mga tawo nga mahadlok na nga mobotar kaniya kay tungod ra usab kini sa iyang pag-ukon-ukon nga tubagon ang mga pasangil.
Matud pa bitaw sa panultihon nga “The truth will set you free” kay kun walay sala ang usa ka tawo sayon ra kaayo niya nga isalikway ang mga pamasangil.
Dili mahimo nga ingnon lang nga pamolitika ang gihimo ni Senador Trillanes sa paghagit og debate kang Binay. Dili ikalimod nga adunay sagol-pamolitika ang gihimo ni Trillanes, unya rason na ba kini nga dili tug-anan ang katawhan kun unsa g’yud ang tinuod?
Ang pagdiki-diki ni Binay pag-atubang sa imbestigasyon ug sa debate anha ra gihapon mobalik kaniya.