EDITORYAL - Namundo sa 2016 Elections

Dunay dakong leksyon ang  nahitabo karon kang Bise Presidente Jejomar Binay ug karon si Senate President Franklin Drilon nga parehong nasentro sa imbestigasyon tungod sa matud pa ilang mga anomaliya ug mga pasangil nga nangawkaw sila sa panudlanan sa katawhan.

Mao kini ang usa sa mga lamas sa politika, kung di ikaw ang dauton, kinahanglang ikaw maoy manaot sa ngalan kunohay sa katarong ug kamatuoran.  Sa laktod pagkaestorya kinahanglang may kasikas ang pangalan aron matiman-an.

Ang negatibong pasangil makadaot sa pagkatawo sa usa ka politiko, apan, at least mahisgutan ilang pangalan sa mga balita kada adlaw, “good or bad publicity is still a publicity.”

Kining nahitabo kang Binay ug Drilon mura kini og usa ka latang ulod nga naablihan. Daghan pang moalisngaw niini nga mga baho.

Si Drilon gipasanginlang nag-overprice sa gitukod nga convention center didto sa Iloilo samtang si Binay gipasanginlang nag-overprice sa Makati parking lot ug karon gipasanginlang nanag-iya og hasyenda nga kusganon niyang gihimakak.

Magpadayon nga magbansiwag ang ilang mga pangalan hangtud unya sa 2015 samtang nagkaduol ang piniliay.

Leksyon kini dili lang sa mga politiko, kondili hasta sa mga botante. Kinahanglang matiman-an kun si kinsa ang angayang ibutang sa pwesto ug kung kinsa ang dili aron dili magmahay ini og lingkod na nila sa pwesto.

Sa local level, nagpungasi  na ang pagpasaka og mga kasong administratiba sa mga naa sa pwesto, aron ini og duol na ang eleksyon, manggawas na ang ilang mga suspension.

Tumong niini nga di nila magamit ang resources sa ilang pwesto atol sa pangampanya ug uban pa. Kining mga kasikas karon pulos ni taktika aron makabentaha sa kontra.