Dako’ng problema ni Mayor Jonas Cortes ang nakit-ang anomaliya sa Commission on Audit sa pag-release sa kagamhanan sa siyudad sa Mandaue og cash incentives ngadto sa mga empleyado nga job orders, clean and green ug mga barangay health ug nutrition workers.
Unsaon kaha pag-esplikar ni Jonas sa kadako sa kantidad nga P36.5 milyones nga gipahat alang sa cash incentives sa naasoy’ng mga empleyado?
Apan ang dako’ng pangutana niini kun nakadawat ba ang mga empleyado niining anomaloso’ng cash incentives ug wala ba kaha’y opisyal nga nakapaburot sa iyang bulsa?
Si Jonas, isip mayor, maoy aduna’y dako’ng tulobagon ning maong anomaliya. Kini tungod kay siya man ang mopirma sa job order agreement (JOA) nga gipreparar sa Human Resource Management Office sa siyudad sa Mandaue ug sa empleyado.
Ang nakaparat lang kay ang empleyado nga ma-hire ubos sa JOA dili “covered” sa Civil Service Rules ug wala’y employee-employer relationship.
Sa ato pa, kun adunay sayop sa proseso sa pag-hire, lakip na ang isyu sa pagbayad sa ilang suweldo nga gihimo’ng inadlaw ubos sa kasabutan, ang mayor maoy mo-um-om niini.
Pero tay’m pa ra gud, ang COA nagkanayon nga kaniadto ra gi-disallow ang paghatag og cash incentives sa mga job order employees, clean and green ug mga health ug nutrition workers sa barangay. Apan ngano’ng nanghatag man gihapon si Jonas niadtong miagi’ng tuig.
Dili usab ko motuo nga wala makabasa si Jonas sa COA Rules nga nagdili niini.
Hagbay ra nga nahilis sa tiyan ang cash incentives nga gipanghatag ni Jonas. Sa ato pa, maglisod na sa pag-uli ang mga nanagpakadawat niini.
Kini ra ba’ng mga job order, clean and green, ug barangay health ug nutrition workers, mga pordoy kaayo kini. Gani, wala’y wala maglisod kanila sa makaluluoy’ng suweldo nga P2,000 nagdto sa P4,000.
* * *
Ang gobiyerno daan ra nga nasayod nga kining job order ug clean and green program sa mga lokal nga kagamhanan bukas kaayo sa abuso ug kurapsiyon sa mga opisyal.
Gihimo usab kini’ng kahimanan sa pagpalapad sa politikanhong gamot ngadto sa mga kabus.
Ang mga pordoy’ng supporters malipay kaayo kun ini’g human sa eleksiyon, maapil sa lista ilang ngalan alang sa trabaho sa clean and green ug job order. Apan ang makapanglimbawot-balhibo nga kasayuran mao nga adunay mga “ghost employees” sa listahan sa mga job orders ug clean and green aron ang kurakot nga mga opisyal makabulsa gikan sa pundo alang niini.
Ang nakapait pa gyud kay usahay ang katabang, drayber ug yaya sa balay apil sa listahan sa mga job order.
Panahon na nga tun-an kini aron mabuhatan og lagda.