Dear Atty. Divine,
Duna koy pangutana may labot sa akong boyfriend nga foreigner. Divorced siya sa iyang asawa apan duna silay duha ka anak. Duna siya’y negosyo sa ilang nasud ug plano niya nga moanhi sa Cebu karong tuiga aron kami magpakasal. Wa mosupak ang iyang mga anak sa among pagminyo apan usa sa ilang kondisyon nga kinahanglan dili ko manghilabot sa ilang negosyo ug sa ilang properties. Miuyon ko sa ilang kondisyon attorney kay basin nagduda sila nga kuwarta ray akong giapas sa ilang amahan. Apan unsa man nga dokumento ang akong pirmahan attorney aron pagtuman sa kondisyon sa iyang mga anak sa dili pa mi magpakasal? Hinaot imo ko nga matambagan kalabot niini. Daghang Salamat.
– Claire
Dear Claire,
Ang atong balaod nagtugot nga ang magtiayon mag-iyahay sa pag-manage sa ilang properties ug kinitaan ug dili maghilabtanay sa ilang kabtangan bisan kun sila minyo na pinaagi sa pagpirma og Marriage Settlement o Pre-nuptial Agreement. Ang maong dokumento kinahanglan pirmahan ninyong duha sa dili pa kamo magminyo aron kini mahimong balido ug mo-epekto kining maong kasabutan sa higayon nga kamo magpakasal na. Sa Pre-nuptial Agreement malatid ngadto nga dili ka manghilabot sa iyang mga property ug kinitaan samtang siya dili sab manghilabot sa imong mga kabtangan ug kinitaan. Ang maayo ninyong buhaton mao ang pagduol og abogado sa dili pa kamo magpakasal aron maandam ang inyong Pre-nuptial Agreement ug ang maong dokumento kinahanglan inyong pirmahan atubangan sa abogado nga mo-notaryo niini sa dili pa ang inyong kasal. Hinaut nga akong natubag ang imong pangutana. Thanks and God Bless.
- Atty. Divine
Alang sa inyong pangutana ipadala lang sa Legal Corner sa Banat News or email sa flores_divina@yahoo.com. ug akong tubagon ang inyong pangutana pinaagi sa akong column mata’g Miyerkules ug Domingo.