Dili na bag-o ang report nga adunay mga guwardiya nga mao ra ang mounay pagpalusot og ilegal nga drugas ngadto sa mga binilanggo nga ilang gibantayan.
Sa karaan nga Bagong Buhay Rehabilitation Center (BBRC) didto sa Barangay Apas ug sa daan nga Cebu Provincial Jail sa M.J. Cuenco Avenue dunay mga guwardiya nga nasakpang mipalusot unta og drugas.
Diha sa Cebu City Jail ug sa silingan nga Cebu Provincial Detention and Rehabilitation Center (CPDRC) sa Barangay Kalunasan, wala pa’y nasakpan sa mga guwardiya.
Apan dili kini imposible kun ang kadagkoan sa bilanggoan mopatuman og estrikto nga pamaagi unya magdestino sila og kasaligan nga maoy morekisa sa mga guwardiya kun mosulod sa bilanggoan.
Ang nakaapan gud karon kay ang mga guwardiya nga mosulod dili man rekisahon. Kutob ra sa pasiatab nga ang guwardiya rekisahon sa ilang pagsulod apan ang tinuod -- wala.
Adunay mga informers ang media nga anaa sulod sa duha ka bilanggoan nga matag karon ug unya mohatag kanila og inpormasyon sa mga panghitabo sa sulod pinaagi sa direkta nga kahimanan – cellphones.
Yano nga makasulod ang cellphones sa bilanggoan kay ang guwardiya man ang mopalit niini para sa mga piniriso sa mahal nga presyo mao nga mag-ilogay ang mga guwardiya sa pagpalusot og cellphones.
Kun molusot man ang mga cellphones ngadto sa prisohan, samot na ang shabu nga puwede ra tagoan. Usa kini ka dako nga hagit sa mga warden sa bilanggoan pagsumpo sa drug smuggling sa prisohan.