Hapit tanang maglilindog sa pamantalaan ug mga kumentarista sa radyo ug telebisyon nihisgot kabahin sa emotional SONA ni PNoy diin ang Presidente nakahilak.
* * *
Usa ka babayeng brodkaster nadunggan nga nag-ingon nga si PNOY may “pusong mamon.” Dihay nitubag nga iya pang gitimbang-timbang kun hain ang mas maayo: Ang “pusong mamon” o ang “pusong bato.”
* * *
Dili lang baya si PNoy ang dunay “pusong mamon.” Si anhing Nelson Mandela nakahilak usab atol sa iyang diskurso human siya napili nga Presidente sa South Africa, diin nakigbatok siya ug nagmadaugon sa apartheid.
* * *
Bisan si US President Barack Obama hikit-an sa mga sakop sa media nga dunay “pusong mamon” dihang mipatu og luha sa paglarga sa pinangga niyang anak babaye padung sa unibersidad alang sa iyang college studies.
* * *
Matud sa Associated Press nakitang “weepy” dihang milakaw na ang iyang anak nga si Malia aron mosud na sa unang ang-ang sa kolehiyo didto sa California. Ang “weepy” sa ato pa kahilakon. Apan sa usa ka balita gikan sa usa ka tabloid sa England dili lang “weepy” si Barack, ni-weep gayud.
* * *
Bisan si Emperor Hirohito, ang giilang labing maisog sa tanang modern day emperors sa Japan, aduna sad diay “pusong mamon” dihang natuan siya’g pipila ka lusok nga luha pagkapukan sa Japan nga mitapos sa WWII. Kini suma sa “Yank” magazine sa US Army.
* * *
SA LAING BAHIN ... Mangumusta kita sa atong mga higalang traysikol ug habal-habal drayber nga usa sa mga loyal readers sa Banat News. Daghang salamat, guys.