Gihinganlan na gyud sa Department of Justice diha sa indictment ang mga ngalan sa mga sakop sa board of directors sa Rural Bank of Subangdaku (Cebu) Inc. nunot sa mga kasong kriminal nga gipasaka sa Bangko Sentral ng Pilipinas batok sa mga opisyal sa bangko nga gipaubos sa receivership niadtong 2009.
Kini human ang DOJ mibasura sa motion for reconsideration nga gisang-at nilang Lapu-Lapu City Mayor Paz Radaza, Francisco S. Gaisano, Peter S. Gaisano, Gloria Gaisano, Sonia U. Go, Divina H. Llamoso, Julius Eullaran, Marmelina Cuevas, Glenn Patrimonio, Aileen A. del Fierro, Rhuel Ayong ug Jufriel B. Argawanon. Ang DOJ mibasura sa mosyon kay ang mga respondents wala na makapresentar og bag-ong argumento nga maglalis sa nahaunang desisyon pagsang-at sa nagkalainlaing kaso.
Ang mga kasong ilang giatubang nagsumikad sa matud pa kapin sa sais mil ka mga “fictitious loans” sa RBSI.
Usa sa kasong kriminal nga ilang atubangon mao ang kalapasan sa balaod sa DOSRI loan. Unsa man kining DOSRI loan? Mao kini ang loan nga gihimo sa “director, officers, staff and related interest” (DOSRI).
Sa ato pa loan kini sa mga dagkong opisyal apil na ang mga director. Kun DOSRI ang loan, kinahanglang mag-agi kini sa makuti nga pakisusi sa board of directors sa bangko (o bisan sa mga kooperatiba). Gilatid kini sa General Banking Law of 2000 aron kaprotehian ang banking industry sa mga pekeng loan nga himuon sa mga opisyal sa banko. Ang ekonomiya sa nasud ang giprotehian usab niini.
Hinuon ning higayona, gihinganlan na gyud sa indictment sa DOJ nga girekomendar ni State Prosecutor Amanda Felipe ug giaprobahan ni Prosecutor General Claro Arellano, ang mga direktor sa RBSI nga silang Francisco, Peter ug Gloria Gaisano.
Kay DOSRI loan man kini, ang angayan patubagon niini mao ang mga direktor sa bangko. Ang presidente sa bangko - kun gitugotan na sa mga direktor ang DOSRI - wala nay mahimo gawas sa pag-aprobar niini. Kun ibasura sa presidente ang loan, adto siya puniton sa tangkongan.
Makalilisang ang kadaghan sa loan nga gi-aprobahan sa mga direktor busa gisusi sa Bangko Sentral ng Pilipinas ang mga ngalan sa nag-loan nga giingong mga yanong trabahante sa dakong tindahan. Asa man diay napunta ang P2.6 bilyones nga gikan sa loan sa RBSI?
Wala ba kaha kini ipabarog og laing negosyo?
* * *
Taliwala sa kasuko sa mga drayber sa mga pampublikong sakyanan sa makakurat nga gidak-on sa mga penalty sa Land Transportation Office ngadto sa mga malapason sa balaod sa trapiko, mag-strike sila karong Lunes.
Sobra ra kadako ang penalty ug dili makaya sa mga pordoy nga drayber. Nakapangagpas ko nga mas motaas ang insidente sa korupsiyon sa LTO ning pagpatuman sa taas nga penalty.
Ngano man? Adunay drayber nga akong na-estorya ug miangkon gyud siya nga magpakiluoy na lang siya sa manakopay ug andaman og suborno aron itunol sa dili pa isyuhan og temporary operator’s permit (TOP). Bitaw, matintal ang mga drayber sa pagtunol na lang kay sa magpadakop.