Kining maong pag-ampo nga gihimo sa Dios ang gitawag ni Papa Benedicto XVI Jubelruf (Joyful Shout). Kalipay kini nga nagasukad sa suod nga pag-ila ni Jesus sa iyang Langitnong amahan ug ang maong pag-ila wala lang niya tipigi ingon nga iyaha lamang, hinunoa, iya kining gihimo nga ang mga tawo makaila pud sa Amahan nga iyang gihigugma.
Sa unsang paagi gipaila ni Jesukristo ang iyang Langitnong Amahan nganhi kanato?
1. Una, pinaagi sa iyang pagpanudlo. Iyang gitudlo nga hapit na maghari ang Dios.
2. Ikaduha, pinaagi sa iyang mga binuhatan. Ang paghimo og mga milagro, labi na gyud ang pag-ayo sa mga masakiton usa ka konkretong pagpakita kun unsa ka dako ang kaayo ug gugma sa Amahan ngadto sa iyang mga Anak.
3. Ikatulo, ang iyang kamatayon mismo nga maoy silbing halad ug bayad sa atong mga sala bunga kini sa iyang pagkamasinugtanon sa iyang Langitnong Amahan.