Puso sa Maynila

Ang puso nga atong ginganlan og packaged rice gibaligya na karon ug daghan nang na “addict” niini didto sa Divisoria, Manila. Kini sumala ni Pedong Bernabe, kinsa maoy gihatagan og kredito isip maoy unang mipaila-ila sa atong puso sa taga Manila.

* * *

Apan naay laing miangkon sa kredito -- si Tonyo Pasumbingay (dili kana angga), Sugbuanon kinsa dugay nang nanimuyo sa Manila partikular sa may North Harbor diin siya kaniadto nagtrabaho isip kargador.

* * *

Ang puso sa Divisoria gibaligya sa mga gagmay apan gidugukan og kustomer ang mga kan-anan. Naay mga namaligya og minudo nga lechon kon inasal nga namaligya sab og puso.

* * *

Matud ni Tonyo ug ni Pedong bisan ang dili lumad nga mga Sugbuanon nakakat-on na sa pagkaon og puso pinarisan og ginagmay nga hiwa sa inasal o ba kaha choriso bisaya.

* * *

Suma pang Tonyo hapit tanang trabahante sa pantalan sa North Harbor naanad na’g kaon og puso nga gibaligya sa Divisoria sa presyo nga P3 sa gagmay ug P5 sa dagko. Naa kunoy mga trabahante nga modaa og puso inig-uli para panihapon. Si misis na lay bahala sa ulam kon sud-an.

* * *

SA LAING BAHIN ... Mangumusta kita sa atong mga higalang magbabasa’g Banat News diha sa Kapitolyo ug City Hall. Salamat sa inyong nagpadayon nga suporta sa Banat News.

* * *

Note: Kining atong lindog karon kinutlo -- nga dunay pagtugot -- sa artikulo ni Benje Ramos, BN reader. Salamat, Benjie.