Mi-interbiner na ang Department of Health sa dakong kontrobersiya nga gikalambigitan sa usa ka nurse kinsa giingong mi-plaster sa baba sa usa ka bag-ong natawo tungod kay sige kini og tiyabaw. Dili na kuno maghulat pa ang DOH og pormal nga reklamo gikan sa ginikanan sa maong bata tungod kay daghan na ang mitumaw nga taho, matud pa ni DOH regional director Jaime Bernades.
Tungod kay mao pa kini nga kaso nga nahitabo dinhi sa Sugbo, angay lamang nga imbestigahon kini sa otoridad. Igo na ang mga taho nga nanggawas sa media alang sa otoridad pag-imbestigar sa maong insidente.
Kini aron matugkad gayud kun unsay nasulod sa ulo sa maong nurse diha sa Cebu Puericulture Center and Maternity House Inc. ngano nga iyang giplasteran ang baba sa maong bata.
Sa akong tan-aw, pwerte gayud ka hanggaw sa maong nurse ug angay siyang imbestigahon. Mora na hinuon siya og wala kaeskuwela sa maayong paagi unsaon pagpahilom sa nagtiyabaw’ng bata.
Tungod lagi sa atong instinct, walay amahan ug inahan nga dili makamao mopakalma sa naghasol nga puya. Kana wala nato nakat-uni og pipila ka tuig gikan sa unsa mang eskuwelahan.
Ang atong parental instinct sukwahi sa kinaadman sa mga nurse. Tungod sa dako nilang kinaadman, dako kita’g pagsalig kanila. Dili gayud malalis kini gumikan sa grabe’ng mga leksiyon nga ilang naagian sa tunghaan.
Apan bisan pa man niini, adunay pipila ka nurse ang usahay mosimang sa unsay naandan. Kini kun bisan pa man nga klarong kalapasan sa lagda ug sa propesyon nga ilang gipanumpaan.
Sama niadtong nurse sa CPCMHI kansang binuhatan angay lamang nga kondenahon gumikan kay sukwahi kini sa lagda sa iyang propesyon. Asa na man ang pipila ka tuig niyang gieskuwelahan?
Angay lamang nga mohimo og dinaliang aksiyon ang DOH niining maong insidente. Kinahanglan nga dili palabyon sa kagamhanan ang ingon niini nga binuhatan.
Ug kun mapamatud-an nga sad-an ang maong nurse, aw angay lamang nga maleksiyon kini. Ug angay pa man gani nga ma-dismiss kini gikan sa serbisyo ug matangtangan sa lisensiya.