Magpapalit si Mayor Michael Rama og 30 ka mahalon nga iPad Air aron ipanghatag sa mga department heads ug uban’g mga opisyal sa City Hall nga iyang mga suod nga alalay.
Pastilan, bisan unsa na lang g’yud tawon ang nahuna-hunaan. Husto g’yud ang pagkahimo sa ulohan sa banner story sa mantalaan nga The Freeman kagahapon “City Executives: iPad, Taxpayers: iPay.â€
Nakapanglingo-lingo ko nga naghuna-huna uy. Paita, gisayonan na lang g’yud tawon sa kwarta nga gibuhis ug nakolekta gikan sa katawhan.
Bahala na og wala makabayad sa uban nga obligasyon basta kay mapalitan ang mga opisyal sa City Hall.
Mga department heads maoy unahon, apan kay 22 ra man ang tanang department heads sa City Hall, aw kinsa pa, adto sa mga sinaligan nga maayo kaayo “mototoy.â€
Sigun sa balita nga paliton kuno ang mao nga kahimanan aron kanunay nga “interconnected on-line†ang mga department head ngadto sa mayor.
Pastilan g’yud tawon. Unsa na man lang diay gamit sa cellphones nga gipalit usab sa City Hall ug gihatagan pa sila og tag P3 mil nga budget, o subra pa gani, sa usa ka buwan?
Kada buwan ang dakbayan mogasto og P60 mil sa bayad sa internet sa mao nga mga tawo nga isyuhan niini nga mga iPad. Ayaw ko’g ingna nga motrabaho sila lapas sa oras nga tingtrabaho? Tell that to the marines!
Sakitan ko maghuna-huna sa pag-usik-usik sa kwarta nga buhis sa katawhan ug sa mga balay-patigayon kay daghan tawon nga bayranan ang wala gani kabayari sa City Hall.
Kun isuwat nako ang tanan diri dili maato. Mga tinun-an nang-graduate na lang lagi nga wala makadawat sa ilang school supply allowance sa nanglabay nga katuigan.
Aw, nindot g’yud hinoon kun magbitbit ka sa iPad Air nga nipis kaayo kay sa ordinaryo nga iPad. Apan alang kanako, pag-usik-usik kini sa kwarta sa katawhan ug sigurado ko nga ang Commission on Audit (COA) motan-aw niini nga extravagant expenses.
Dili kini maoy makapalambo sa trabaho sa usa ka department head. Dili pa ba diay igo nga ang ilang mga opisina adunay mga internet connections?
Subra na uy. Daghan gani nga opisyal diha nga bisan dunay isyu nga sakyanan kobra lang gihapon og transportation allowance.
Dili tukma nga ako pa sila nga pahinumdoman nga ang pagdumala sa dakbayan dili kay pahimuslan ang kwarta sa katawhan kun dili gamiton kini aron pagtabang sa mga nanginahanglan.