Kapistahan ni San Pedro Calungsod adtong miaging Abril 2 apan mura’g wa kaayo’y kisaw sa pipila sa atong mga simbahan. Ambot lang kaha diha sa inyong parokya.
* * *
Didto sa Sampaloc, Manila, ang mga managsilingan nga mga Bisaya mihimo’g simpleng kasaulogan, diin ang namuno mao si Mrs. Leah Martinez. Dili siya Bisaya. Usa siya ka Tagala kinsa nakabasa sa kaagi ni Pedro Calungsod ug diha-diha nahimong deboto sa batan-ong Santo.
* * *
Matud ni Mrs. Martinez daghang Bisaya ang wala kaayo makaila sa ilang kaugalingong Santo. Busa mihimo siya og Calungsod study matag weekend hangtud mitubo ang gugma ngadto ni San Pedro sa mga Bisaya.
* * *
Adtong miaging Abril 2 mipasiugda si Mrs. Martinez og simpli lang nga selebrasyon. Dunay misa alang sa batang Santo sa simbahan sud sa UST. Sa sunod kuno nga kapistahan ni San Pedro Calungsod basin sa dako-daku na nga simbahan nila himoon ang kasaulogan.
* * *
Si Mrs. Leah Martinez mianhi sa Sugbo sunod ugma human ang piyesta ni San Pedro Calungsod. Gida siya sa iyang mga higala sa San Pedro Calungsod chapel sa SRP. Pagkahuman didto usab sila sa Calungsod Shrine sa may Archbishop’s palace.
* * *
SA LAING BAHIN ... Daghang salamat sa mga magbabasa sa Banat News lakip na ang mga drayber sa taxi ug PUJ.