Naglagiting na karon ang kainit sa panahon ug mitukma usab pagsulod sa bulan sa Marso nga maoy gipili nga bulan sa matag tuig sa atong kabomberohan pagsaulog sa “Fire Prevention Month†nga nagtimaan sa pagpahimangno sa katawhan dinhi sa nasud sa paglikay nga mahitabo ang sunog.
Ang makapagba nga kainit sa bulan sa Marso maoy nagsumpay sa kainit sa milabay nga bulan sa Pebrero sanglit sa maong bulan nahitabo man usab ang makasaysayanong “EDSA People Power Revolution†sa tuig 1986 nga maoy naghatod sa pagkalagpot sa diktadoriyang pamunoan ni anhing Presidente Ferdinand Edralin Marcos nga milungtad og 20 ka tuig nga gidugayon.
Namatikdan na hinuon ang maong makasaysayanong panghitabo nga EDSA People Power I sa mga batan-on karong panahona nga daw nagkahilis ang iyang kabililhon tungod kay natabonan man kini sa labing init pa nga mga isyu nga maoy gisaw-an karon sa paghisgot sa magtapok nga mga tawo.
Naglakip na niini ang nagpadayon nga pagka-hospital arrest ni kanhi Presidente Gloria Macapagal Arroyo nga kongresista karon sa Pampanga, ang pagkatanggong karon ni Janet Lim-Napoles tungod sa isyu sa Pork barrel Fund nga maoy nasentro sa paglambigit sila sa Senador Juan Ponce Enrile, Senador Jinggoy Estrada ug Senador Bong Revilla.
Gikaluhaan pa gayod ang maong isyu sa Disbursement Acceleration Fund, (DAF) nga gialigar nga ang salapi gikan niini maoy gigamit alang sa paghatag og kasayon sa pagpalagpot ni kanhi Chief Justice Renato Corona pinaagi sa impeachment, gidugangan pa sa rice smuggling, pagpanulis, pagpamatay ug uban pa.
Sa pagsaulog karong tuiga sa halandumon nga EDSA People Power I nakahukom ang presidente nga sa Sugbo pagahimoon ang reenactment sa 28 ka tuig niining kasaulogan. Daghan ang nahinangop kay sa labing unang higayon gihatagan man usab og pag-ila ang dakong natampo sa mga Sugboanon nga maoy hinungdan sa kalampusan sa pagpakita sa gahom sa katawhan.
Apan ang pipila miingon nga ang People Power sa Sugbo maoy nagsilbing epekto sa pagtumaw usab sa mga bag-o nga teknolohiya nga cellphone ug computer nga dali lamang kaayong ma-delete ang lugar ug mga pangalan sa tawo nga wala na kinahanglana sama usab sa pagwagtang sa eksena nila ni Senador Juan Ponce Enrile, kanhi Senador Gregorio Honasan ug sa EDSA nga nahitaboan sa People Power 1.