Pahinumdom na pud: Ang Sinulog Grand Parade dili “mardi gras”

Mag-Sinulog na pod ta. Ang fiesta sa Balaang Bata, ug ang Sinulog Grand Parade, giisip nga labing daku nga kasaulogan sa tibuok nasud, after sa kapiyestahan sa Black Nazarene sa Quiapo. Karon, mao nay atong madunggan ang mga kagahob sa tugtog sa Sinulog. Alegre na kaayo.

Apan, sama sa miaging tuig, aduna pay matintal nga taga-media paggamit sa pulong “mardi gras,”  both sa print ug broadcast, referring to the parade, kay alang nila, nindot kaayong paminawon ug basahon.

Matag tuig nagpahinumdom kita nga dili haum ang kahulogan sa mardi gras nga i-refer sa grand parade.  Sumaa sa atong napatik sa nangaging katuigan, ug tungod kay duna pa may mogamit sa pulong “mardi gras,” ambut ngano, ania atong pahinumdom pag-usab:

Ang 1957 Modern American Dictionary, mihatag ning mosund nga kahulogan sa “Mardi Gras: “ Last day before Lent, celebrated in New Orleans, etc, with festivities.”

Ang Collins English Dictionary, sa laing bahin, nagkanayon usab: “Festivities of Shrove Tuesday (Ang Shrove Tuesday is the Tuesday before Ash Wednesday, unang adlaw sa Lent).

Samtang ang Lexicon Webster Dictionary, sa Grolier Book of Knowledge: mihatag usab ning mosunod nga meaning: “Shrove Tuesday; the last day of the carnival, celebrated in Paris, New Orleans and other cities, with parades & special festivities.”

Atong makita nga ang maong mga kahulogan wala gayu’y relasyon sa pagsaulog sa Fiesta Señor ug sa Sinulog Grand Parade.

Pahinumdom usab nga sa among panahon, panahon ni kanhi Customs Collector Boy Odilao, niadtong panahona, siya ang regional head sa MYSD, iyang gi-introduce ngadto sa ARENA 7, ang Sinulog. Iyang intention mao ang pagdala sa sinulog nga gisayaw sa mga tindera sa kandela, pagawas sa Basilica, ngadto sa kadalanan – apan halad gihapon ngadto sa Sto. Niño.

Mao usab kini ang intensiyon ni Mayor Dodong Solon, sa iyang pagsagop sa Sinulog nga mahimong dakung kasaulogan sa dakbayan sa Sugbo. Dili kiat-kiat, dili karnabal, dili paghubog-hubog, dili pagpintal ug paghugawhugaw sa nawong. Lahi kini sa Ati-Atihan ug sa Dinagyang,  gani gihunong man ang participation sa mga sexing bayot sakay sa float – kundili, ang Sinulog grand parade, primarily ug basically, usa ka kasaulogan, usa ka street dancing, halad ug sangpit ngadto sa Batang Hesus.

Ug sa laing bahin magpahinumdom usab kita nga ang Novena, siyam gyud ka adlaw. Walay novena nga tulo o pito ra ka adlaw. Busa, sayop ang pag-ingon nga Nine-day Novena. Maoy hinungdan nga kompletohon gyud nato ang (siyam ka adlaw) pag-Novena ug pagtambong sa Santos nga Misa. Otherwise, wala ikaw maka-Novena, kun ang imong gitambongan ang first day ra, o agad lang sa imong gana, o kun dili mag-uwan.

Sa ato pa, kondisyonal o taphaw ang imong pag-debosyon sa Santo Niño. Kun unsa man ang atong pangayuon gikan sa Santo Niño, niining bag-ong tuig, tambag sa usa ka Feng Shui Master: Sumikap at magdasal. Pit Senyor!