Dili mokubos sa 27.5 milyones ka mga Pilipino ang walay pansayan sa ilang mga panimalay ug 13 milyones walay access nga tubig nga mainom, sumala sa World Bank ug sa United States Agency for International Development (USAID) sa pagtuon nga ilang gihimo. Ang datos kon data nga nahipos nagpakita ug nagtug-an lamang nga ang mga Pilipino nag-atubang sa kawad-on ug kalisod sa panginabuhi.
Ang dili maayo nga pasilidad nga labayanan sa hugaw maoy nag-unang hinungdan nga adunay mamatay nga 11,338 ka tawo kada tuig gikan sa diarrhea kon 31 ka tawo ang mamatay kada-adlaw kadaghanan niini mga bata, sumala sa pagtuon nga gihimo.
Si Sen. Miriam Defensor Santiago, mihangyo sa hingtungdang komitiba sa senado sa pagtan-aw ug paghatag og dakong pagtagad sa hygiene and sanitation sa nasud in aid of legislation.
Miduso si Sen. Miriam Defensor Santiago og resolution no. 326 nga nagpunting sa pagtuon nga gihimo sa World Bank ug sa USAID kun unsay epekto niini sa ekonomiya ilabi na sa turismo nga dako kaayo’g gikatabang sa panudlanan sa nasud.
Sa pagtuon nga gihimo aduna lamay 3.3 porsiyento ka mga Pilipino nga adunay koneksiyon nga luwas sa pasilidad ug 95 porsiyento nag-atubang sa hugaw gikan sa biya nga mga likido sa mga dagkong pabrika nga maoy hinungdan sa kahugaw na karon sa atong kadagatan ug kasapaan.
Busa, gikinahanglan kaayo nato nga adunay pansayan ang matag pamilya alang sa limpyo ug preskong hangin sa palibot nga atong mahanggap aron sa ingon niana luwas ug himsog kanunay ang atong panglawas.