SK wagtangon?

Sigurado ko nga mangasuko kanako ang mga batan-on kay malipay ko nga wagtangon na lang g’yud ang Sanguniang Kabataan (SK) nga gahinan og pundo sa kagamhanan.

Ambot ug unsa kaha nga proyekto ang namugna sa mga sakop sa SK ug nga pila kaha kabuok mga SK representatives diha sa mga barangay, municipal ug city councils nga aktibo sa deliberations sa mga isyu?

Diri gani sa Cebu City Council, panagsa ra man kaayo motingog ang representante sa SK atul nga magtuki og isyu ang mga konsehal.

Tan-aw nako makamao baya ni sila kay mga college student kining maong mga SK federation presidents, apan dili lang g’yud lagi magtingog. Kana gud nga mosulti na ang mga SK representatives sa konseho, paka-paka lang lagi ang iningles, lupig pa ang mga beterano nga konsehal.

Labi na kadto sila si Glena Bontuyan ug Rengelle Pelayo diri sa dakbayan sa Sugbo, pagka larino mosulti og ininglis, apan sa gihapon dili sila kaayo moapil sa pagtuki sa mga isyu.

Ang nindot g’yud unta sa maong mga SK representatives nga motingog sila ug moapil sa pagtuki sa mga isyu kay sila ang mga tingog sa kabatan-onan diha sa konseho.

Apan nakabantay ko nga ang ilang himoon mao ra man ang pagtan-aw kun ang mga gisumiter nga isyu diha sa “agenda” kompleto ba sa mga gikinahanglan nga papeles. Dili kana maayo kay ang katawhan nga magtan-aw kaninyo gikuwangan sa inyong partisipasyon.

Kining ako, dili pagdaut sa SK, kun dili paghatag lang og ideya niadtong mga nagplano nga mosalmot sa Sanguniang Kabataan kun kini kahatagan pa og higayon nga ikapadayon.

* * *

Diay reklamo sa usa ka lumulopyo sa Tuyan, Naga. Dunay piggery nga gi-operate diha nga nakamugna og grabe kabahu ngadto sa nagpuyo sa maong dapit.

Ang tag-iya niining maong piggery mao ang usa ka “Heide” sigun sa mireklamo nako. Na hala, mga opisyal sa Naga, tan-awa kining maong isyu kay mireklamo na ang taga Tuyan.

Dunay report nga akong nadawat nga usa ka wanted nga kriminal nga anaa magpuyo sa Tejero wala gayud dakpa sa mga polis. Nangahadlok ang mga silingan kay basin sila na usab ang pamatyon.

Na hala, kun mangutana ang mga polis ilabi na si Intelligence Chief Romeo Santander, pangutana mo ni Konsehal Garry Lao kay nakaila g’yud kuno’s Garry aning usa ka Harold. Unsa kini katinuod nga polis nga ang bansagon nagsugod og letra nga “C” maoy nagdumala sa tigbakayan diha sa atbang sa usa ka bakery sa Sitio Kawayan, Banawa?

Kernel Noli Romana, atimana!