Mga panghinaut sa pagtahan ni Janet Napoles

Milugwa gayod gikan sa lungag nga iyang gitagoan ang giilang rayna sa pork barrel scam nga si Mrs. Janet Napoles nga gikatahong wala na magpakita sulod sa pipila ka adlaw nga nakalabay human sa pagluwat sa korte og warrant of arrest sa kaso nga illegal detention nga iyang giatubang.

Bisan kun ang kaso nga kasamtangan karon niyang giatubang walay kalambigitan ang init nga isyu sa pork barrel scam apan sa gihapon daghan ang mihugyaw sa kahinangop sanglit mahimo na man siyang masukitsukit sa pagpalutaw sa kamatuoran.

Kini matigayon sa pagahimoon unya nga imbestigasyon nga maoy makaingon sa kulbahinam nga pagabation sa katawhan sanglit hayan nga malambigit man  ang pipila ka mga  dagkong opisyal sa atong kagamhanan ug nalakip na unya niini ang mga  magbabalaod sa senado, kongreso ug mga dagkong opisyal sa nagkadaiyang sangang buhatan sa nasudnong  kagamhanan.

Nunot niining maong lakang sa pagpalutaw sa kamatuoran nga naglambigit sa pag-abuso sa dakong gahin nga salapi nga naggikan sa buhis sa katawhang Pilipinhon maoy gipanghinaut kining mosunod:

1. Nga  sa  imbestigasyon nga pagahimoon maoy nagtangkil niini ang mga panghinaut sa katawhan nga unta ang giilang pork barrel queen makahunahuna sa pagtug-an sa kamatuoran sa walay pagtabon ni bisan kinsa nga maligsan nga mahimong anaa sa administrasyon  ug dili lang ang mga sakop sa oposisyon.

2.  Nga unta ang kapolisan diin ubos karon sa ilang higpit nga pagbantay si  Mrs. Napoles ilang tagdon sama sa ordinaryo nga dinakpan nga gibalhog sa ordinaryong selda nga higpit nga gidili ang cellphone, walay telebisyon ug labaw sa tanan dili aircondition ang selda nga gibalhogan.

3. Nga unta ang National Bureau of Investigation (NBI) maoy tahasan sa pag-imbestigar kang Napoles ug dili ang kapolisan nga ubos sa kamandoan sa Department of Interior and Local Government (DILG) nga gipangulohan ni Secretary Mar Roxas aron ang mga nalambigit nga magbabalaod dili makakita og mga gingi sa pagpangatarungan nga ang pork barrel scam investigation gitumong lamang sa pagguba sa ilang imahen nga nagplano sa pagpapili og taas pa nga katungdanan sa 2016 election.

4.  Nga unta ang tanan nga pagaluwatan nga pamahayag ni Napoles sa mga imbestigasyon nga pagahimoon iyang kaugalingong kabubut-on, dili pinugos ug walay nagdiktar nga dagkong opisyal sa tumong mao lamang ang paglikay nga maduhig ang pipila ka mga  opisyal nga kaalyado sa administrasyon.

5. Nga unta human sa nabutyag nga gialigar nga pag-abuso sa buhis sa katawhang Pilipinhon niining tuig  2013,  mahimo na untang matinud-anon ang mga opisyal sa kagamhanan sa pagtuman sa gitahas kanilang kaakohan nga mao ang paghatag og kaayohan sa katawhan nga kinasingkasing nilang gialagaran.