Sikat pa kaayo karon apan kun isyuhan na gani og warrant of arrest panington na sa kakuyaw.
Mao kini warning ni Senador Ping Lacson ngadto sa mga nalambigit sa P10 billion pork barrel scam.
Hala, pangandam sa mga katarungan aron makaikyas sa bug-at nga silot nga gipaandam ni Pres. Aquino.
Hinuon wa lang hisayri kun niining 3 ka senador ug 20 kapin ka kongresista mapriso ba kaha sila. Kun manglayas kini ug magpausab sa dagway, aw daghan na kaayo ang dakpunon sa NBI ug kapolisan.
Gani si Napoles kinsa giingong nagpausab sa dagway maglisud na paglangkat sa iyang dagway kun buot siyang mo-state witness.
Maayo lang kun susama sa mascara nga puwede rang huboon kun mopahuway.
Apan kun gituyo gyud sa pagpausab ang dagway unya may gidugang ug may gikuha dayon gitahi , gipalanay ug gidikit, aw kun imo kining usbon pagkasakit kaha unya di na mahibalik ang orihinal.
Hinuon kining mga magbabalaod karon nga ania ra sa nasud ug mamatud-an nga sad-an sila sa imbistigasyon, aw kun maghunahuna sila paggawas kinahanglang bantayan ang mga exit points sa nasud.
Kun magpausab sa ilang dagway, mas maayong pasidan-an ang mga plastic surgery clinic aron nga di kini nila buhaton o kaha mahilakip sila sa silot nga ipahamtang batok sa mga makasasala.