Mga sanglitanan sa mga I-Statements:
1. Dong, Maguol baya ko kun ikaw mag-usik usik sa imong pagkaon kay lisud baya ang pagpangita og ikapalit aron duna kay makaon.
2. Day, nasakitan ko kay imo mang giaway si Tricia imong manghud. Wala baya gyuy gipalabi ninyo. Parehas man mong akong gipangga.
3. Dong, malipay man ko nga mopahiyom ka apan mawala ang akong gana kun makita ko ang imong ngipon nga walay limpiyo kay wala ka mag-toothbrush.
Ang tumong sa pagpahayag sa mga I-Statements dili lang ang pagbuyag sa bata tungod sa iyang walay hinungdang binuhatan kondili usab ang pagpagawas ingon nga ginikanan sa imong gibati sama sa kasuko, kasagmuyo, ug pangluod nga dili ka makapasakit sa imong anak.
Mga Praktikal nga Tugon:
1. Gamita ang mga I-Statements kun ikaw ma-irita. Ayaw paabota nga ikaw masuko.
2. Likayi ang paghatag og sulbad sa problema o pagbungat og mga mando ngadto sa imong mga anak.
3. Kun ugaling dili gihapon mosalir ang unang mga hut-ong sa mga I-Statements, mas haom nga imong himoon ang pagbungat og mga laing mga I-Statements nga mas bug-at ug mas mabination (with feelings) kaysa nag-una.
Dako og kahimoan ang mga I-Statements aron mausab sa imong bata ang dili maayong binuhatan nga dili makadaot sa iyang pagtan-aw sa iyang kaugalingon o dili ba kaha mahimong masamdan ang inyong relasyon.